कैलारीमे बजार अनुगमन

पहुरा समाचारदाता
धनगढी, ११ कार्तिक । कैलारी गाउँपालिकाके अनुगमन समितिसे पालिकाके मुख्य मुख्य बजारके अनुगमन करल बा ।
अनुगमन समितिके संयोजक तथा गाउँपालिका उपाध्यक्ष भगवतीकुमारी चौधरीके अगुवाईमे बुधके रोज बजार अनुगमन कैगिल हो । समितिसे कैलारी गाउँपालिका वडा नम्बर वडा नम्बर ६ के बेनौली बजार, वडा नम्बर ८ के मोहनी बजार ओ वडा नम्बर ९ के गदरिया बजारके अनुगमन कैगिल हो । समितिसे किराना पसल, खाद्यन्न पसल, मेडिकल तथा भेटनरी पसल, कपरा पसललगायत टमान व्यावसायिक फर्मके अनुगमन कैगिल हो ।

अनुगमनके क्रममे दर्ता नैहुइल पसलहे पालिकामे तुरुन्त दर्ता हुइना, नविकरण नैहुइल पसलहे नविकरण कैना, म्याद ओराइल सामान बेचे नैहुइनालगायतके सुझाव ओ निर्देशन डेहल बा । अनुगमन समितिमे संयोजक भगवतीकुमारी चौधरी, वडा नम्बर ६ के वडा अध्यक्ष प्रेम बहादुर चौधरी, कार्यपालिका सदस्य सुनिला चौधरी, लालबहादुर विक, सामाजिक विकास समिति शाखा प्रमुख यगम कलेल, योजना शाखा प्रमुख सन्तोषकुमार चौधरी, स्वास्थ्य शाखा प्रमुख नरेशकुमार चौधरी, पशु शाखा प्रमुख सुर्य चौधरी, कृषि शाखा प्रमुख मैया चौधरी, इलाका प्रहरी कार्यालयके प्रतिनिधिलगायतके सहभागिता रहे । ओस्टेक करके विफेक रोज हसुलिया बजार ओ पवेरा बजारके अनुगमन कैगिल बा ।