एम्बुलेन्स फेन नेंगे नैसेकठ, मर्मत सम्भारमे चरम ढिलासुस्ती

धनगढी, २१ सावन । कैलालीके मसुरिया–हसुलिया सडक खण्ड मर्मत सम्भारमे चरम ढिला सुस्ती हुइल बा ।

बर्खासे पहिलेही मर्मत सम्भार नैहोके ठाउँ–ठाउँमे बरवार–बरवार खटाहा बनसेकल ओ हाल वर्खाके समयमे यि सडक हिलाम्मे हुइल बा । मने मर्मत सम्भारमे सम्बन्धित निकाय संवेदनशिलता नैडेखाइलपाछे आवातजावत बहुट कष्टकर हुइल हो ।

उ १९ किलोमिटर सडक खण्डके जिरो पोइन्ट रहल पूर्वपश्चिम महेन्द्रराजमार्गस्थित बडैपुरसे लौसा गाउँसम करिब साढे ३ किलोमिटर सडक यहिसे पहिले कालोपत्रे होसेकल बा । मने बाँकी सडक मजासे ग्राबेलसम नैहुँई सेकलपाछे आवातजावात कर्ना मनैनहे बहुट दुख हुइटी आइल बा ।
उ सडकमे एम्बुलेन्स समेत नेगे छोरल स्थनाीयबासी बटैले बाटेै । कैलारी गाउँपालिका–६ बेनौलीके रविना महतोके अनुसार हिल्ला के कारण २ चो एम्बुलेन्स ओजलपाछे विरामी बोक्ना एम्बुलेन्स फिर्ता हुइटी आइल बटैली । जौनकारण अकालमे ज्यान गुमाइक पर्र्ना अवस्था सिर्जना हुइल उहाँ जानकारी डेली ।

उ सडकखण्ड जिल्लाके गौरीगंगा नगरपालिका, कैलारी गाउँपालिका ओ धनगढी उपमहानगरपालिका जोर्ना प्रमुुख सडक हो । मने चार पांग्रे किल नाई पैदल यात्री समेत नेगे नैसेक्ना मरके हिल्लाहा हुइलपाछे बहुट कठिनाई भोग्टी आइल स्थानीयबासी बटैले बाटै ।
कैलारी गाउँपालिका वडा नंं. २ कैलारी गाउँके प्रेम चौधरी गाउँपालिकाके प्रमुख मेरुदण्डके रुपमे उ सडक रहलेसे फेन मर्मत सम्भार तथा स्रोन्नतीमे चरम वेवास्ता हुइटी आइल बटैलै ।

उ हिलाम्मे सडक कैलारी गाउँपालिकाके क्षेत्रभिट्टर परठ । उ सडकमे आवातजावत करटी आइल स्थानीयबासी किल नाई, गाउँपालिका कार्यालय हुसुलिया बजारसम पुग्न जे फेन हैरान होसेकल स्वयम गाउँपालिकाका कर्मचारीहुक्रे फेन भुक्तभोगी हुइलेसे फेन मर्मत सम्भारमे तदारुक्ता नैडेखागिल हो ।

गौरीगंगा नगरपालिकाके मसुरियामे बैठ्टी आइल गाउँपालिकाके वडा नं. ६ के वडा सचिव अन्नत कडेल ओ गौरीगंगा नपाके राजीपुुर बैठ्टी आइल गाउँपालिकाके वडा नंं १ के सचिव मञ्जु अधिकारी गाउँपालिका कार्यालय ओ वडा कार्यालय पुग्न बहुट परेसानी हुइटी आइल बटैटी आइल बाटै ।

वडा सचिव कडेल कहलै–‘वडा कार्यालय बनकट्टा जाइक परठ टे, १० बार सोचेक् परठ । का कर्ना हो कार्यालय जैहिक् परठ । कैचो टे सडकमे गिरसेक्ले बाटु ।’
स्थानीयबासी उ सडक तत्काल कालोपत्रे नाई, मजासे नेंगे सेक्ना मेरके बनाइक पर्ना कहटी माग करटी आइल बाटै । मने समयमे जनताहुकनके पीर मर्का सरकारी निकाय नैबुझ्ल कहटी स्थानीय जनता आक्रोशित समेत हुइल बाटै ।

कैलारी गाउँपालिका–६ बेनौलीके जगदिश महतो अप्ने घरक् आँगना आघे हिल्लाहा होके झालापाटा डारल सडक डेखैटी कहलै–‘हेरी न लाज लागेक पर्ना हो सरकारहे । ग्राबेल डारेक पर्ना ठाउँमे स्थानीयहुक्रे कुछ सीप नैचललपाछे बनुवाम्से झाला काटके सडकमे रहल खटाहामे डर्लै ।’
ओहोर कैलारी गाउँपालिका यि सडक मर्मत सम्भारके काम जारी रहल बटैले बा । गाउँपालिकाके सबइन्जीनियर गोविन्द रोकाया सडक मर्मत सम्भारके लाग ठेक्का होके काम फेन सुरु होसेकल दाबी कर्लै ।

गाउँपालिका यी सडक मर्मत सम्भारके लाग २ खण्डमे ठेक्का डेहल रहे । लौसा गाउँसे बेनौली पेट्रोल पम्पसम ओ बेनौली पेट्रोल पम्पसे बरका मुुडासम मर्मत सम्भारके ठेक्का ठाकुर कन्ट्रक्सन हुलिया पैले बा ।

गाउँपालिकाके सबइन्जीनियर रोकाया अग्टारे परटी रहल पानी संगे आइल बाढके कारण काममे ढिलाई हुइल बटैटी बर्खा रुक्टी किल १ हप्ताभिट्टर मजासे नेंग्ना लायक बनाके छोर्ना प्रतिवद्धता व्यक्त कर्लै ।

कालोपत्रेके लाग ठेक्का

उ सडक कालोपत्रेके लाग फेन ठेक्का समझौता होसेकल जनागिल बा । निर्माण कम्पनी संग कालोपत्रेके लाग आव २०७६÷२०७७ के अन्तिमओहोर ठेक्का समझौता हुइल सडक डिभिजन कार्यालय कञ्चनपुर जनैले बा । डिभिजन कार्यालयके सूचनाअ अधिकारी एंव इन्जीनियर लक्ष्मणदत्त जोशीके अनुसार संघीय सरकारके प्रत्येक निर्वाचन क्षेत्रमे सडक कालोपत्रे कर्ना योजना अनुसार १० करोडके इस्टीमेट अनुसार कालोपत्रे हुइना हुइल हो ।

५ खण्डमे विभाजन करके उ सडक कालोपत्रे हुइना हुइल बा । जेकर लाग फागुनमे ठेक्का आ≈वान हुइल जनागिल बा । जौन २०७७ चैत्र १५ गतेभिट्टर निर्माण सम्पन्न करेक पर्र्ना ठेक्का समझौता हुइल सूचना अधिकारी जोशी बटैलै । कालोपत्रेके लाग मल्ल निर्माण सेवालगायत निर्माण व्यवसायी ठेक्का पैले बाटै ।