बलात्कार दुस्प्रयास आरोपमे नेकपाके सांसद रावल पक्राउ

पहुरा समाचारदाता
धनगढी, २१ फागुन । सुदूरपश्चिम प्रदेश सभाके सदस्य अक्कलबहादुर रावल एक महिलाउप्पर बलात्कारके दुस्प्रयास करल आरोपमे पक्राउ परल बाटै ।
नेकपासे प्रतिनिधित्व करल सांसद रावलहे बलात्कारके दुस्प्रयास करल आरोपमे जिल्ला प्रहरी कार्यालय कैलाली बुधके रोज पक्राउ करल जनैले बा । धनगढी उपमहानगरपालिका–४ उत्तरबेहडीके भोज हुइल महिला अपन उप्पर बलात्कारके कोसिस करल आरोप लगैटी जिल्ला प्रहरी कार्यालय कैलालीमे उजुरी डेहल एक अठुवारपाछे रावल पक्राउ परल हुइट । प्रदेश सभाके सदस्य रावलके बिरुद्ध फागुन १४ गते प्रहरीमे उजुरी परल रहे ।
जाहेरीमे उ महिला प्रदेशसभा सदस्य रावल अपन उप्पर माघ २१ गते जवर्जस्ती करणीके दुस्प्रयास करल आरोप लगैले बाटी । जिल्ला प्रहरी कार्यालय कैलालीके प्रवक्ता दक्षकुमार बस्नेत रावलहे पक्राउ करल स्वीकार करलै ।
रावल अपन विरुद्ध उजुरी परलपाछे ओकरबारेमे बुझ्न बुधके अपनही जिल्ला प्रहरी कार्यालय कैलाली पुगल बताइल बा । महिलाके उजुरीपपाछे पक्राउ पूर्जी जारी करल प्रहरी रावलहे नियन्त्रणमे लेके अनुसन्धान सुरु करल डिएसपी बस्नेत बटैलै ।
प्रहरी बिफेक रोज रावलहे हिरासतमे धारके थप अनुसन्धान कैना अदालतसे अनुमती लेना बटैले बा । रावल अछाम क्षेत्र नम्बर २ के ख से निर्र्वािचत नेकपाके सांसद हुइट  । उहाँ प्रदेश सभामे नेकपा संसदीय दलके सचेतक हुइट ।
स्थानीय तहके निर्वाचनमे मेयरमे पराजित रावल प्रदेश सभाके निर्वाचनमे भने विजयी हइल रहिट । रावल अपन उप्पर लगाइल आरोप झुठा रहल बटैले बाटै । उहाँ अपनहे फसाइल जिकिर करले बाटै ।
नेकपासे निर्वाचित सांसद तथा सुदूर पश्चिम प्रदेश सरकारके सामाजिक विकास मन्त्री दीर्घ सोडारी महिलासंगके अनैतिक सम्बन्धके कारण मन्त्रीसे बर्खास्त करल रहिट ।