थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २३ अगहन २६४६, शुक्कर ]
[ वि.सं २३ मंसिर २०७९, शुक्रबार ]
[ 09 Dec 2022, Friday ]

धनगढीमे कोरोना सर्तकता अपनैटी

पहुरा समाचारदाता | २४ फाल्गुन २०७६, शनिबार
धनगढीमे कोरोना सर्तकता अपनैटी

उपमहानगरपालिकालिकाके सक्कु विद्यालय बन्द

त्रिनगर भन्सार नाकामे हेल्प डेस्क स्थापना

पहुरा समाचारदाता
धनगढी, २४ फागुन । कोरोना भाइरस (कोभिड १९) के संवेलनशिलताके लाग धनगढीमे सतर्कताके गतिविधि सुरु हुइल बा ।
भारतके राजधानी दिल्लीमे कोरोना भाईरसके संक्रमण डेखा परल खबर बाहेर आइलपाछे नेपाल भारत सिमवर्ती शहर धनगढीमे उच्च सर्तकता अपनैटी रहल बा । धनगढीसे दिल्लीके दुरी ४ सय ३९.७ किलोमिटरके दुरी रहल बा । सडक यातायातसे ९ घण्टा ४२ मिनेटमे धनगढीसे दिल्ली पुगजाइठ । उच्च सर्तकता अन्तरगत धनगढी उप–महानगरपालिकाके अगुवाईमे तीनु सुरक्षा निकाय, नेपाल रेडक्रस सोसाईटी कैलाली शाखाके समन्वयमे त्रिगरभन्सार नाकामे हेल्प डेस्क स्थापना करल बा ।
हेल्प डेस्क २४ घण्टा खुला रहना धनगढी उप–महानगरपालिका प्रमुख नृपबहादुर वड बटैलै । उहाँ कहलै, भारतसे लौटुइयाहे स्वास्थ्य परीक्षण कैना, बिरामी भेटलेसे उपचारके लाग स्वास्थ्य संस्थामे पुगैना एम्बुलेन्सके समेत व्यवस्था कैजाई ।
ओस्टेक कोरोना भाइरस संक्रमण फैले सेक्ना कहटी सरकारसे चैत ५ गतेभिट्टर वार्षिक परीक्षा सेक्ना निर्देशन डेहल बेला धनगढी उपमहानगरपालिका उहीसे आघे विद्यालय बन्द कैना निर्देशन जारी करले बा ।
धनगढी उपमहानगरपालिका शुकके एक विज्ञप्ति जारी करटी नगर क्षेत्रके सक्कु माध्यमिक तहसमके शैक्षिक संस्था बन्द कैना निर्देशन डेहल हो । उपमहानगरपालिकाके निर्णय अनुसार अँट्वारसे लागू हुइना मेरके शैक्षिक संस्था बन्द कैना निर्णय करले बा ।
विज्ञप्तिमे कहल बा, ‘यी उपमहानगरपालिका अन्तर्गत सञ्चालित सामुदायिक तथा संस्थागत विद्यालय लगायत सम्पूर्ण शिक्षण संस्थामे आधारभूत तथा विद्यालयके आन्तरिक परीक्षा लगायत पठनपाठनके सक्कु क्रियाकलाप औरे सूचना नाइ हुइटसम फागुन २५ गतेसे लागू हुइना मेरके बन्द कैना निर्णय करल व्यहोरा सक्कु शिक्षक, विद्यार्थी, अभिभावक ओ आम नगरवासीमे जानकारी कराइल बा ।’ सरकारसे कोरोना भाइसर संक्रमणके त्रासके कारण विद्यालयहे हालीसे हाली परीक्षा सम्पन्न करैना शिक्षा मन्त्रालयहे निर्देशन डेहल रहे मने धनगढी उपमहानगरप भर अँट्वारसे नै अनिश्चितकालके लाग विद्यालय बन्द कैना निर्देशन डेहल बा ।
कोरोना रोग रोकथाम तथा नियन्त्रण उच्चस्तरीय समन्वय समितिके बिफेक रोज रक्षा मन्त्रालयमे बैठल बैठकसे विद्यालयमे अध्ययन करुइया बालबालिकाहे कोरोना संक्रमण हाली हुइ सेक्ना हुइल ओरसे हाली परीक्षा सम्पन्न करैना मन्त्रालयहे निर्देशन डेहल रहे ।
सरकारके निर्देशन अनुसार सरकारी तथा निजी विद्यालय फागुन २८ गतेसे नै वार्षिक परीक्षा सञ्चालन करे पर्ना रहे । मने धनगढीमे भर आब वार्षिक परीक्षा अनिश्चित हुइना हुइल बा ।
यिहे विषयहे लेके धनगढी उप–महानगरपालिका जिल्लाके सरकारी तथा गैरसरकारी संस्थासंग समन्वय बैठक करले बा । विपद परलहे कैसिक सामना कैना कना विषयमे छलफल हुइल उप–महानगरपालिका जनैले बा । धनगढी विमानस्थलमे रहल हेल्पडेस्कके अवस्थाफे सक्रिय अवस्थामे राखल बा । ओस्टेक करके धनगढी उप–महानगरपालिका क्षेत्रमे कोरोना भाईरसके बारेमे जनचेता फैलैना पर्चापम्पलेट लगायत टोलटोलमे महिला स्वास्थ्य स्वयं सेविका परिचालन करल बा ।

कोरोना सम्बन्धी सचेतना
धनगढीमे कोरोना भाईरस सम्बन्धी सचेतना कार्यक्रम सम्पन्न हुइल बा ।
होटल व्यवसायी संघ कैलाली, वैंकर्स क्लब धनगढी हेल्प प्रालि ओ बैतडी समाजके संयुक्त आयोजनामे सचेतना कार्यक्रम सम्पन्न हुइल हो । कार्यक्रममे कोरोना भाईरसे बचक लाग सजकता अपनाइ पर्नामे जोड डेहल रहे । ओस्टके यकर संक्रमण फैले नाइ डेहक लाग सरकारहे संवेदनशीलता अपनैना फेन सरोकारवाला आग्रह करले बाटै ।
कोरोनाके संक्रमण हालीसे हाली मनैनमे फैलना ओ फोक्सोमे सिधे संक्रमण फैलके मनैनके मृत्यु समेत हुइना गम्भिर प्रकृतिके रोग रहल ओरसे संवेदनशीलतासे बचक लाग सक्कु जनहनहे कार्यक्रम मार्फत जानकारी समेत डेहल बा ।
यी रोग स्वासप्रस्वाससे नाइ फैलना होके हात मिलाइबर, लग्गे बैठ्लेसे, नेंगेबर, बोलेबर समेत हावाके माध्यमसे सर्ना हुइल ओरसे संघरियनसे भेटघाट हुइबर हात नाइ मिलैना, दुई मिटर दुरे बैठ्ना, मास्क लगैना, साबुन पानीसे हात सफा कैना, कुछ दिनके लाग पुग्ना मेरके घरमे खाद्यान्नके जोहो मिलाके रख्ना समेत अनुरोध करल बा ।
केरोना भाईरसके सम्वेदनशिलताके लाग धनगढी उप–महानगरपालिका क्षेत्रभिट्टरके कौनो मेरके बार्षिकोत्सव, भेला, सभा, सम्मेलन, महोत्सव, उत्सवके साथे मनैनके भिडाभाडमे कैना मेरके कार्यक्रम आयोजना नाइ कैना धनगढी उपमहानगरपालिका यिहीसे आघे नै आग्रह करसेकल बा ।
होटल व्यवसायी संघके महासचिव आभेष चन्द सञ्चालन करल कार्यक्रममे साईकल अभियन्ता सुमित कार्कीहे सम्मान समेत करल रहे । साईकल अभियन्ता कार्कीहे वैंकर्स क्लबके अध्यक्ष धर्म्सिंह विष्ट ओ समाजसेवी पृथ्वी चन्द मायाके चिनो सहित नगद ५÷५ हजार सहयोग समेत करल रहिट ।

जनाअवजको टिप्पणीहरू