कोरोनाके धनगढीमे उच्च सतर्कता

पहुरा समाचारदाता
धनगढी, २५ फागुन । भारतके राजधानी दिल्लीमे कोरोना भाईरसके संक्रमण डेखापरल खबर बाहेर आइलपाछे धनगढीमे उच्च सतर्कता अपनाइल बा ।
उच्च सर्तकता अन्तर्गत धनगढी उपमहानगरपालिकाके अगुवाईमे तीनु सुरक्षा निकाय, नेपाल रेडक्रस सोसाईटी कैलाली शाखाके समन्वयमे त्रिगरभन्सार नाकामे हेल्प डेस्क स्थापना करल बा । हेल्प डेस्क २४ घण्टा खुला रहना धनगढी उपमहानगरपालिका प्रमुख नृपबहादुर वड बटैलै । उहाँ कहलै, भारतसे लौटुइयाहुकनहे स्वास्थ्य परीक्षण कैना, विरामी भेटलेसे उपचारके लाग स्वास्थ्य संस्थामे पुगैना एम्बुलेन्सके समेत व्यवस्था कैजाई ।
नेपाल भारत सिमवर्ती शहर धनगढीमे उच्च सर्तकता अपनाइल बा । धनगढीसे दिल्लीके दुरी ४ सय ३९.७ किलोमिटरके दुरी रहल बा । सडक यातायातसे ९ घण्टा ४२ मिनेटमे धनगढीसे दिल्ली पुगजाई । यिहे विषयहे लेके धनगढी उपमहानगरपालिका जिल्लाके सरकारी तथा गैरसरकारी संस्था संग समन्वय बैठक सम्पन्न करले बा । विपद परलमे कैसिक सामना कैना कना विषयमे छलफल हुइल उपमहानगरपालिका जनैले बा । धनगढी विमानस्थलमे रहल हेल्पडेस्कके अवस्थाफे सक्रिय अवस्थामे धारल बा । ओस्टेक करके कोरोना भाईरसके बारेमे जनचेता फैलैना पर्चापम्पलेट लगायत टोलटोलमे महिला स्वास्थ्य स्वयंसेविका परिचालन करल धनगढी उपमहानगरपालिका जनैले बा ।

मन्त्रालयके पत्राचार अनुसार परीक्षा कैना निर्णय
कोरोला भाइरसके उच्च सम्वेदनशीलताके लाग कहटी धनगढी उपमहानगरपालिकामे शिक्षा सरोकारवालाके बैठक दुसर सूचना जारी नइहुइटसम विद्यालय बन्द कैना कहिके करल निर्णय शनिच्चरके शिक्षा सरोकारवालाके बैठकसे पुनर्विचार करले बा ।
संघीय मामिला तथा सामान्य प्रशासन मन्त्रालय स्थानीय तह समन्वय शाखासे शुकके दुपहर शिक्षा विज्ञान तथा प्रविधि मन्त्रालय चैत ५ गते भिटर कक्षा १ से ९ समके परीक्षा सम्पन्न कर सेके पर्ना कहिके पत्राचार करल पत्र प्राप्त हुइलाछे फेर शिक्षा सरोकारवालाहुकनके बैठक बोलाके निर्णयमे पुर्नविचार करल धनगढी उपमहानगरपालिकाके प्रमुख नृपबहादुर वड बटैलै । दुसर सूचना प्रकाशित नहुइटसम पठन–पाठन ओ परीक्षा रोक्ना निर्णय शिक्षा सरोकारवालाहुकनके बैठकसे करल रहे । उहे बैठक सूचना प्रकाशित करके चैत ५ गतेसम परीक्षा संचालन तथा पठनपाठनके काम सूचारु कैना निर्णय करल हो ।
धनगढी उप–महानगरपालिकाके उप–प्रमुख सुशिला मिश्र भट्ट शुकके कौनो एक व्यक्तिसे नइहुके कोरोना संवेदनशिलताके लाग कहटी बैठकसे निर्णय करल बटैली । उहाँ कहली, शिक्षा विज्ञान तथा प्रविधि मन्त्रालयके आधिकारीक पत्र प्राप्त हुइलपाछे शिक्षा सरोकारवालाहुक्रे निर्णयमे पुनर्विचार करल हो ।
धनगढीके त्रिनगर माध्यमिक विद्यालयके प्र.अ. भूपाल सिंह खड्का धनगढी उपमहानगरपालिका फागुन २३ गते करल निर्णय कोरोना भाइरसके संवेदनशीलताके लाग करल हुइलेसेफे शिक्षा विज्ञान तथा प्रविधी मन्त्रालयके पत्र चैत ५ गते भिटरे परीक्षा सम्पन्न करसेके पर्ना अवस्था आइल बटैलै ।
उहाँ कहलै, धनगढी उपमहानगरपालिकासे करल निर्णय केक्रे हार वा जितके विषय नइहो ।
प्याप्सनके केन्द्रीय सदस्य हरी रेग्मी शुकके धनगढी उप–महानगरपालिकासे करल निर्णयमे अपने उपस्थित हुइल ओरसे जिम्मेवारी लेना तयार रहल बटैलै । उहाँ कहलै, मजाके लाग निर्णय करे खोजल हो, मजाके लाग दुसर निर्णय कैगिल ।