स्वास्थ्य विज्ञ टोलीसे प्रसूति केन्द्रके अनुगमन

पहुरा समाचारदाता
धनगढी, १ चैत । धनगढी उपमहानगरपालिकासे संचालनमे नानल प्रसूति केन्द्रके शुकके स्वास्थ्य विज्ञके टोलीसे अनुगमन करले बा ।
धनगढी उपमहानगरपालिकाके उपप्रमुख शुसिला मिश्र भट्टके अनुसार स्वास्थ्य मन्त्रालयके पूर्व सचिव सुशिल प्याकुरेल, हनी मल्ल लगायतके टोली धनगढी उपमहानगरपालिकाके प्रसुती केन्द्रके अनुगमन करल हुइट । उपप्रमुख भट्ट धनगढी उपमहानगरपालिका ७ मे रहल बेली शहरी स्वास्थ्य प्रवद्र्धन केन्द्र, वडा नं १९ मे रहल फुलवारी स्वास्थ्य चौकी, वडा नं १६ मे रहल घसिटा स्वास्थ्य चौकीमे संचालनमे रहल प्रसुती केन्द्रके अनुगमन करल बटैली । अब्बे संचालनमे रहल प्रसुती केन्द्रके सेवाहे थप गुणस्तरीय बनाइक लाग हाली कार्यक्रम नन्ना तयारी हुइटी रहल बा उपप्रमुख भट्ट कहली, टबमारे स्वास्थ्यके विज्ञ टोलीहे अनुगमनमे लैगिल हुई । नेपाल सरकार स्वास्थ्य मन्त्रालयके पूर्व सचिव सुशिल प्याकुरेल सेती प्रादेशिक अस्पतालमे गोल्डेन कम्यूनिटीके सहयोगमे प्रसुतीहे गुणस्तरीय बनैना संचालनमे नानल कार्यक्रम धनगढी उप–महानगरपालिकाके प्रसुती केन्द्रमेफे संचालनमे नन्ना तयारी हुइटी रहल बटैलै ।
ओस्टेक करके पूर्व सचिव सुशिल प्याकुरेल त्रिनगर भन्सार नाकामे कोरोना भाइरस भित्रे नइडेना उपमहानगरपालिकासे संचालनमे नानल हेल्थ डेस्कके अनुगमन करलै । उपमहानगरपालिका अपने प्रयाससे हेल्थ डेस्कमे बहुट प्रभावकारी रुपमे काम करटी रहल पाइल प्याकुरेल कहलै, मने प्रदेश सरकारके सहयोग उहाँ खट्कल मै पैनु । प्रदेशके मुख्य नाका हुकेफे प्रदेश गतिविधी संचालन करे नाइसेकल भेटगिल बा ।