आलु पकेटके लाग कृषि सामाग्री हस्तान्तरण

कैलाली, २९ बैशाख । आलु पकेट क्षेत्रके लाग कैलारी गाउँपालिका वडा नं. ९ के कृषकहुक्रनहे सोम्मारके कृषि सामाग्री हस्तान्तरण करल बा ।
परिश्रम कृषि सहकारी संस्था ओ कृषि ज्ञान केन्द्रके अनुदान सहयोगमे कृषकहे उ सामाग्री हस्तान्तरण करल हो । कोरोना भाइरस (कोभिड १९) के भयसंगे सहकारीसे सामाजिक दुरी कायम कैके सामाग्री हस्तान्तरण करल जनाइल बा । गाउँपालिकाके अध्यक्ष लाजुराम चौधरी आलु पकेटके लाग कृषि सामाग्रीमे पावर टिलर, स्प्रे ट्यांकी, क्रेट, पानी टान्ने मोटर, सिँचाई बोरिङ्ग लगायत सामाग्री हस्तान्तरण करल हो ।

सहकारीके अध्यक्ष रामसमझ चौधरीके अनुसार कृषि ज्ञान केन्द्र ४ लाख ७५ हजार आर्थिक अनुदान सहयोग ओ सहकारी मार्फत उ सामाग्री हस्तान्तरण करल जानकारी डेलै । उहाँ आलु पकेट क्षेत्रके लाग कृषकहे ३ ठो पावर टिलर, ३० थान इलेक्ट्रोनिक स्प्रे ट्यांकी, ७० क्रेट, २ ठो पानी तान्न मोटर, सिँचाईके लाग २ ठो सिँचाई बोरिंग हस्तान्तरण करल जानकारी डेलै ।