५० शैयाके कोरोना अस्पताल तयार, सेती प्रादेशिक अस्पतालहे हस्तान्तरण
धनगढी, १२ जेठ । १ महिनाके अवधीमे नवनिर्मित धनगढीस्थित कोरोना अस्पताल हस्तान्तरण करगिल बा ।
सुदूरपश्चिम प्रदेश सरकारके लगानी तथा जिल्ला स्वास्थ्य कार्यालय कैलालीमार्फत निर्माण हुइल अस्पताल सोम्मारके रोज सेती प्रादेशिक अस्पताल धनगढीहे हस्तान्तरण करगिल हो । सामाजिक विकास मन्त्री कृष्णराज सुवेदीमार्फत हस्तान्तरण करगिल बा ।
किनारा कन्सट्रक्सन ९४ लाखके लागतमे निर्माण करल अस्पतालमे बिरामीहुकनके लाग आवश्यक पर्ना शैया, अक्सिजन पलान्ट, खानेपानी, बिजुली, शौचालयके व्यवस्थापन करगिल बा । आब थप व्यवस्थापन ओ सञ्चालनके काम सेती प्रादेशिक अस्पतालसे हुइना जनागिल बा ।
रोगके संक्रमण बह्रटी गैल बेला सुदूरपश्चिम प्रदेशके अस्थायी राजधानी धनगढीमे कोरोना विशेष अस्पताल निर्माण करगिल हो ।
वैशाख १ गतेसे निर्माणके काम सुरु करल अस्पतालके भौतिक संरचना वैशाख ३१ गते पूरा हुइल रहे । नेपालमे रहल निर्माण सामग्री प्रयोग करके ‘प्रि–फ्याब हाउस’ तयार पारगिल बा ।
