चिकित्सकके सेवासे कोरोनाके बिरामी ढुक्क

कैलाली, १३ जेठ । कैलालीके टीकापुर अस्पतालमे रहलकोभिड–१९ संक्रमित तीनु जनहनके अवस्था सामान्य रहल बा । उहाँहुक्रनमध्ये ४० वर्षीय एक जनहनहे सामान्य रुघा लागल बा कलेसे अन्य १९ ओ २१ वर्षीय युवकहे कुछ समस्या डेखल नाइहो ।
४० वर्षीय पुरुष भारतके महाराष्ट्रसे आइल हुइट कलेसे १९ वर्षीय युवक सुनसरीके इटहरी ओ २१ वर्षीय युवक बाँकेके नेपालगञ्जसे आइल हुइट । कैलालीके जानकी गाउँपालिका ७ घर रहल २१ वर्षीय युवक गत वैशाख २९ गते बाँकेसे आइल हुइट । बाँकेमे अध्ययनरत उहाँ एम्बुलेन्समे आके पाँच दिन घर बैठलपाछे जानकी–७ के वडाध्यक्ष लक्ष्मण चौधरी ओहकान घरमे जाके युवकहे क्वारेन्टाइन बैठ्ना आग्रह करलै ।
गाउँपालिकासे स्थापना करल क्वारेन्टिनमे राखल १६ जनहनके स्वाब परीक्षण करेबर शुकके तीन जनहनके नतिजा पोजेटिभ आइल हो । टीकापुर अस्पतालमे भर्ना करल उहाँहुक्रनके दैनिक दुईचो ज्वरो नाप्न करल बा । उ बाहेक चिकित्सकसे नियमित जाँच हुइटी रहल बा । कोरोना संक्रमितहे अस्पतालमे राखलपाछे वहाँ त्रास बह्रल बा । अस्पतालमे नियमित उपचारमे अउइया घटल बाटै । ‘संक्रमितहुक्रनमे समस्या नाइहो । संक्रमित राखलपाछे अस्पतालमे अउइया बिरामी भर घटल बाटै ्।’, टीकापुर अस्पतालके डा जीतेन्द्र कँडेल कहलै, ‘अस्पतालमे दैनिक तीन सय पचास जनेसम बिरामी आइट । आजकल एक डेढ सय जने किल अइना करल बाटै ।’’
अस्पताल दुई अँठ्वार आघे किल बहिरङ्ग सेवा सञ्चालनमे लानल रहे । ओपिडी सेवा सञ्चालनमे आइलपाछे बिरामीके संख्या बह्रल रहे । डा.कँडेल अस्पतालसे नियमित सेवा डेटी रहल बटैलै ।‘हम्रे डराइल नाइ हुइटी, यम्ने समयमे हमार डेना सेवा थप करले बाटी’’, डा. कँडेल कहलै, ‘‘बिरामीके अक्के समयमे भीड नहोए कहिके २४ सै घण्टा ल्याब ओ एक्सरे सेवा शुरु करले बाटी ।’’
अस्पतालसे बालबालिकाके लाग नियमित खोप ओ प्रसूति सेवा निरन्तर डेहल जनाइल बा । संक्रमित अस्पतालसे डेहल सेवाप्रति सन्तुष्ट बाटै । संक्रमितमध्येके २१ वर्षीय युवक आवश्यक सेवा समयमे पैटीरहल बटैठै ।‘‘पानीके कार्टुन राख डेहल बा । खैनाचीज समयमे पैले बाटी’, उहाँ कहलै, ‘‘अस्पतालसे सकारे चिया, दिनके दुईचो खाना ओ एकचो खाजा डेना करल बा ।’’
ओहकान अनुसार तीनु जनहनहे अक्के कोठामे बासके व्यवस्था करल बा । ‘‘शौचालय, बाथरुम उहे कोठामे बा, बैठक लाग खासे समस्या नाइहो’’, युवक कहलै, ‘‘२४ सै घण्टा कोठामे बैठ्ना कठिन रहठ् । मोरसंग टे मोवाइल बा । अन्य दुई जने संक्रमितसंग मोबाइल नाइहो ।’’
अस्पतालसे इन्टरनेट जडान करडेले बा । उहाँहुक्रे उहे एकठो मोबाइलमे गीत बजैठै । गफ कैके समय व्यतीत करठै ।
उहाँहुक्रे आपनमे बिरामीके कौनो लक्षण नाइ डेखल मने कोरोना लागल बटाइलपाछे मनमे त्रास बह्रल बटैलै ।‘‘ठोर ठोर डर फेन लागल बा मने तिनुुजाने कोरोना संक्रमणहे हरैबी कना हिम्मत करले बाटी’’, संक्रमितमध्येके १९ वर्षीय युवक कहठै ‘‘डाक्टरहुक्रे कुछ नाइ हुइट कहले बाटै । डाक्टरहुक्रनके बात सुनके डर हट्ना करल बा ।’’ रासस