सुदूरपश्चिम सरकारके लोगोमे लिम्पियाधुरा, विवादित क्षेत्र कहलपाछे अर्थमन्त्री बोहराके कहाई हटागिल

धनगढी, १३ जेठ । सुदूरपश्चिम प्रदेशभिट्टर पर्ना दार्चुला जिल्लाके कालापानी, लिपुलेक ओ लिम्पिधुरा क्षेत्रहे विवादित क्षेत्र कहलपाछे प्रदेश सरकारके आर्थिक मामिला तथा योजना मन्त्री झपट बहादुर बोहराके कहाई हटागिल बा ।

आपन लौव लोगोमे समेत उ भूभाग समावेश करसेकल सुदूरपश्चिम प्रदेश सरकारके बहालवाला मन्त्री विवादित कहलपाछे उहाँके कहाई प्रदेश सभाके रेकर्डसे हटागिल हो ।

प्रदेश सभाके मंगरके रोजसे शुरु हुइल छैठौ अधिवेसनके पहिल बैठकमे मन्त्री बोहरा प्रदेश सरकारके आव २०७७÷२०७८ के विनियोजन विधेयक प्रस्तुत कर्ना क्रममे उ बात बोलल रहिट ।

लगत्ते सत्तारुढ दल नेकपाके प्रदेश सभा सदस्य दिर्घबहादुर सोडारी नियमापत्ति जनाइल रहिट । प्रदेश सभा सदस्य सोडारीके नियमापत्तिपाछे सभामुख अर्जुनबहादुर थापा उहाँके कहाई रेकर्डसे हटैना निर्देशन डेहल रहिट ।