भौतिक दूरी विना प्रदेश सभाके अधिवेसन धमाधम !
लखन चौधरी
धनगढी, २२ जेठ । सुदूरपश्चिम प्रदेश सभाके छैठौं अधिवेसन जेठ १३ गतेसे जारी बा । अधिवेसन प्रदेश सरकारके नीति तथा कार्यक्रम ओ अइना बजेटमे केन्द्रीत बा । नीति तथा कार्यक्रम ओ बजेट कोभिड १९ के आँजरपाँजर घुमल बा ।
मने कोभिड १९ के रोकथाम तथा नियन्त्रणमे केन्द्रीत रहल अधिवेसनमे कोभिड १९ से बाँचेक् लाग पालना करेक पर्ना न्यूनतम मापदण्ड ‘भौतिक दूरी’ समेत कायम नैहुइल पागिल बा ।
विश्व स्वास्थ्य संगठन भौतिक दूरीके मापदण्ड एक मनैसे डोसर मनै समके दूरी कम्तिमे फेन एक मिटर अर्थात ३.३ फिट दूरी कायम करेक पर्ना कहले बा । मने सुदूरपश्चिम प्रदेश सभामे दूरी कायम नैकरल हो ।
नेपाली काँग्रेसके प्रदेश सभा सदस्य भरतबहादुर खड्का कहलै–‘विश्व स्वास्थ्य संगठनके नम्स्हे जन्टीजन्टी फेन स्थान अभावके कारण दूरी मेन्टेन नैहुइल हो, यी बातहे स्वाीकारे परठ हम्रे । डोसरओहोर नेपालीहुकनके घुलमिल हुइना बानीक् कारण फेन हो । असार १ गते बजेट नानेक् पर्ना संवैधानिक बाध्यताके कारण जोखिम मोलके फेन अधिवेसनमे भाग लेटी आइल बाटी । हम्रे फेन जोखिममे बाटी ।’
राष्ट्रिय जनता पार्टीके प्रदेश सभा सदस्य कृष्णबहादुर चौधरी फेन चाहके फेन डरेडरमे अधिवेसनमे सहाभागी हुइटी आइल बटैठै ।
‘बजारके तरकारी, दूधलगायत अत्यावश्यक वस्तु प्रयोग करेबर फेन डर मन्ठु । मै ते नेंग्के प्रदेश सभा पुग्ठु । मने जब प्रदेश सभामे पुग्ठु, उहाँ ते झने १ फिटके दूरीमे बाचचित हुइठ । निक्रेबर, पेलेबर एक डोसरके सम्पर्कमे आजाइठ । का कर्ना हो बाध्यताबंश प्रदेश सभा सदस्यहुक्रे ओहै, उहाँहुकनके सहयोगी संगे, मर्यादापालक, कर्मचारी, गाडी चालकहुकनके भीरभार’–‘हम्रे बरवार बरवार बात करुइया कोभिड १९ से बचेक् लाग पहिल शर्तके रुपमे रहल भौतिक दूरी कायम करे नैसेक्ले हुइटी ।’
नेकपाके प्रमुख सचेतक तारालामा तामाड्ड धिउर हदसम सावधानी अप्नैटी आइल बटैठै । दूरी कायम नैकर्लेसे फेन आपन बैठ्न कुर्सी परिवर्तन नैकर्र्ना, प्रत्येक दिन जुरी नप्न, मास्क, सेनिटाइजरके प्रयोग करटी आइल उहाँके कहाइ बा ।
प्रदेश सभासचिवालय स्थान अभावके कारण दूरी कायम करे नैसेकल स्वीकार करल होे । प्रदेश सभा सचिवालयके सचिव रामसिंह धामी साविक जिल्ला विकास समिति कैलालीके मौजुदा संरचनाहे प्रदेश सभा बनाइइल बटैटी स्थान अभावके कारण ओ धनगढीमे उपलब्ध नैहुइलपाछे आउर सावधान अप्नाके अधिवेसन सञ्चालन करल दाबी कर्लै ।
प्रदेश सभामे प्रतिपक्षी दल नेपाली काँग्रेसके १२ ओ राष्ट्रिय जनता पार्टीके २ जानेसहित ५३ प्रदेश सभा सदस्यहुकनके प्रतिनिधित्व रहल बा ।
