थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २३ अगहन २६४६, शुक्कर ]
[ वि.सं २३ मंसिर २०७९, शुक्रबार ]
[ 09 Dec 2022, Friday ]

नगरपालिकाके सहयोगमे थारु छात्राबास निर्माण

पहुरा | ३ असार २०७७, बुधबार
नगरपालिकाके सहयोगमे थारु छात्राबास निर्माण

पहुरा समाचारदाता
बेलौरी ३ असार ।
कञ्चनपुरके बेलौरी नगरपालिका वडा नं. ४ मे थारु छात्राबास निर्माण हुइटी बा । नगरपालिकाके आर्थिक सहयोगमे थारु कल्याणकारिणी सभा कञ्चनपुर थारु छात्राबास निर्माण करे लागल हो ।
नगरपालिकासे थाकसके समन्वयमे छात्राबासके लाग दूई तले भवनके निर्माण कैना ३० लाख रुपैया बजेट विनियोजन करले बा । नगरपालिकाके नगर प्रमुख पोतीलाल चौधरी थारु छात्राबास निर्माण कैना चरणबद्ध रुपसे बजेट विनियोजन करल बटैलै ।
उहाँ पहिल वर्ष २०७५÷०७६ मे १० लाख ओ दुसरा वर्ष २०७६÷०७७ मे २० लाख रुपैयाँ थारु छात्राबासके लाग बजेट विनियोजन करल जानकारी डेलै । नगरप्रमुख चौधरी बेलौरी नगरपालिका डगौरा थारु तथा राना थारु बाहुल क्षेत्र रहल ओरसे थारु समुदायके पहिचानसंग जोरल टमान संरचनाके निर्माणमे बजेट विनियोजन करल बटैलै ।
उहाँ नगरपालिकासे नगर भल्मन्सा समिति गठन करल बटैटी योजना छनौट करेबेर भलमन्साके निर्णयहे प्रथामिता डेटी आइल जानकारी डेलै । नगरपालिकासे थारु संग्रालय, थारु देउथनुवाके लागफे बजेट विनियोजन करटी आइल नगरप्रमुख चौधरी बटैलै ।
थारु कल्याणकारिणीसभा कञ्चनपुरके जिल्ला सभापति मेवाराम चौधरी नगरपालिकासंगके सहकार्यमे छात्रावास निर्माण कार्य आघे बढाइल बटैलै । थाकससे पहिल वर्ष भवनके जग निर्माण करल बटैटी दुसरा वर्ष पहिल तल्ल निर्माण करे लागल जानकारी डेलै । उहाँ उ भवन पाँच तल्ले बनैना योजनाके साथ जग निर्माण करल बटैलै ।
सभापति चौधरी नगरपालिकाके आर्थिक सहयोगमे थाकससे थारु समुदायके कला संस्कृति तथा पहिचान झल्कना टमान कार्यक्रमफे करटी आइल बटैलै ।
बेलौरी नगरपालिका विगतसे थारुहुकनके चाड पर्व माघ, अटवारी, अष्टिम्की, होली जैसिन पर्वके लागफे बजेट विनियोजन करटी आइल बा । साथे थारुके हकहित तथा पहिचान संरक्षणके लागफे टमान कार्यक्रम, अन्तरक्तिया तथा बहस करटी आइल सभापति चौधरी बटैलै । उहाँ अइना वर्षफे नगरपालिकाके समन्वयमे थारु समुदायके सवालमे काम कैना निधो रहल बटैलै ।

जनाअवजको टिप्पणीहरू