सुदूरपश्चिममे थप १ सय ३७ जहनमे कोरोना पुष्टि

धनगढी, ४ असार । राष्ट्रिय जनस्वास्थ्य प्रयोगशाला टेकुमे हुइल परीक्षणमे आज सुदूरपश्चिममे थप १ सय ३७ जहनमे कोरोना संक्रमण पुष्टि हुइल बा । डडेल्धुरा, बैतडी ओ अछाम जिल्लामे कोरोना पुष्टि हुइल बा ।
परीक्षणमे डडेल्धुराके ८३, अछाममे २९ ओ बैतडीमे २५ जहनमे कोरोना संक्रमण पुष्टि हुइल स्वास्थ्य कार्यालयहुक्रे बटैलै बाटै ।
स्वास्थ्य कार्यालय बैतडीके प्रमुख योगेशप्रसाद भट्ट भारतके टमान ठाउँसे स्वदेश लौटल क्वारेन्टाइनमे बैठल आरडीटी रिपोट पोजेटिभ देखापरल २५ जहनके पीसीआर रिपोर्ट फेन पोजेटिभ आइल बटैलै । दशरथचन्द नगरपालिकाके १० जाने, सिगास गाउँपालिकाके ६ जाने, पञ्चेश्वर गाउँपालिकाके ४ जाने, सुर्नया गाउँपालिकाके ३ जाने ओ पाटन नगरपालिकाके २ जहनमे कोरोना पुष्टि हुइल हो ।
नयाँ संक्रमित २५ जाने मध्ये २ जाने महिला ओ २३ पुरुष रहल बाटै । यी संगै बैतडीमे कोरोना संक्रमितके संख्या ५२ पुगल बा । नयाँ थपल संक्रमितहुक्रे क्वारेन्टाइनमे रहल जानकारी आइल ओ उहाँहुकनके स्वास्थ्य अवस्था हेरके आइसोलेसनमे राख्ना स्वास्थ्य कार्यालयका प्रमुख भट्ट बटैलै ।
ओहोर स्वास्थ्य कार्यालय अछामके प्रमुख झनक ढुंगानाके अनुसार अछाम जिल्लाके मेल्लेख गाउँपालिकामे २३ जाने ओ सांफेबगर नगरपालिकामे ६ जाने नयाँ संक्रमित फेला परल बाटै । यीसंगे जिल्लामे संक्रमितके संख्या ५१ पुगल बा ।
अस्टेक डडेल्धुरा जिल्लामे थप ८३ जहनमे कोरोना पुष्टि हुइल डडेल्धुराका कोभिड–१९ सम्पर्क व्यक्ति हरिप्रशाद भट्ट बटैलै । संक्रमितके स्थानीय तह भर खुलल नैहो । यीसँगे जिल्लामे कोरोना संक्रमतिके संख्या एक सय २२ पुगल बा । सुदूरपश्चिममे एक ठो किल प्रयोगशाला ओ स्वाबके चाप बह्रटी गिलपाछे दुई हजार ६६ जहनके स्वाब परीक्षणके लाग काठमाडौँ पठागिल रहे ।

#Coronavirus

#Covid-19