क्वारेन्टिनमे खटल स्वास्थ्यकर्मीमे कोरोना संक्रमण

धनगढी, ७ असार । कैलालीमे थप एक जाने स्वास्थ्यकर्मीमे कोरोना संक्रमण पुष्टि हुइल बा । जिल्लाके जानकी गाउँपालिकामे रहल पथरिया स्वास्थ्य चौकीमे कार्यरत स्वास्थ्यकर्मीहे कोरोना संक्रमण पुष्टि हुइल स्वास्थ्य शाखा प्रमुख जितबहादुर चौधरी बटैलै ।
नम्मा समयसे क्वारेन्टिनमे रहलहुकनके स्वास्थ्य परीक्षणमे खटल २८ वर्षीया महिला स्वास्थ्यकर्मीमे संक्रमण पुष्टि हुइल चौधरी जनाकारी डेलै । उहाँ कहलै, ‘जेठके ३० गते उहाँक स्वाब संकलन करल रहे । शनिच्चर पोजेटिभ रिर्पाेट आइल ।’
उहाँहे अब्बे पथरिया स्वास्थ्य चौकीमे आइसोलेसन वार्ड तयार करके उहे राखल बा । यी संगे सुदूरपश्चिम प्रदेशमे ६ जाने स्वास्थ्यकर्मीमे संक्रमण पुष्टि हुइल बा । यी आघे कञ्चनपुरके २ जाने, डडेल्धुरकामे २ जाने ओ सेती प्रादेशिक अस्पतालमे १ स्वास्थ्यकर्मीमे संक्रमण पुष्टि हुइल रहे ।