टीकापुरमे रगतके माग बह्रल

पहुरा समाचारदाता
टीकापुर, ९ असार । सुत्केरी, रक्तअल्पता ओ सिकलसेलके बिरामीहे रगत आपूर्ति करटी आइल टीकापुरस्थित रक्त सञ्चार केन्द्रमे रगतके माग बह्रे लागल बा ।
टीकापुर अस्पतालमे विशेषज्ञ चिकित्सकके सेवा थप हुइलपाछे रगतके माग बह्रे लागल हो । नेपाल रेडक्रस सोसाइटी टीकापुर उपशाखाद्वारा सञ्चालित केन्द्रसे महिनामे १०० पिन्ट ढिउर रगत आपूर्ति करले बा । विगतमे सुत्केरीहे आवश्यक पर्ना रगत आपूर्ति करलमे यी बेला स्त्रीरोग विशेषज्ञ डा गौरी रिजाल सेवा डेहे लागलपाछे रगतके माग बह्रे लागल हो ।
टीकापुर अस्पतालमे दिनहुँ तीनसे पाँच शल्यक्रिया हुइ लागल बावै । अइसीक अधिकांशहे रगत आवश्यक पर्ना हुइलपाछे केन्द्रहे रगत आपूर्ति कैना धौधौ परल केन्द्रके संयोजक टेकराज बिनाडी बटैलै ।‘विगतसे चार महिनायहोर रगतके माग बह्रल बा, यकर अक्के कारण अस्पतालमे शल्यक्रिया करुइयाके संख्या बह्रल बा ’’, संयोजक बिनाडी कहलै, ‘‘आब रगत आपूर्ति कैना विषयमे रेडक्रस थप योजना बनाइ पर्ना डेखगैल ।’
विगतमे चार चिकित्सक कार्यरत रहल अस्पतालमे विशेषज्ञ चिकित्सक एक जने किल रहिट । हाल विशेषज्ञ चिकित्सक सात ओ पाँच मेडिकल अधिकृतसहित १२ जने कार्यरत रहल बाटै । छ महिनासे टीकापुरमे रगतके माग बह्रलेसे फेन रगत आपूर्तिमे भर समस्या हुइना करल रेडक्रस उपशाखा जनैले बा ।
रगत आपूर्तिके लाग नेपाल रेडक्रस सोसाइटी टीकापुर संघसंस्था ओ व्यक्तिहे हारगुहार कैके आपूर्ति करटी आइल बा । चालु आर्थिक बरसके अब्बेसम एक हजार दुई सय पिन्ट रगत खपत होसेकल बा । रगतके माग बह्रलपाछे टीकापुरमे बन्दाबन्दी समयमे दुई सय पिन्ट रगत संकलन हुइल बा ।
बन्दाबन्दीमे बिरामीहे रगत अभाव हुइ लागलपाछे स्थानीय युवा ओ संघसंस्था दान करल हुइट । अस्पतालमे चाहना रगत यी क्षेत्रके संघसंस्था ओ व्यक्ति दान करठै । रेडक्रसके तथ्यांक हेरेबर टीकापुरमे महिनामे ७० से १३० पिन्ट रगत खपत हुइना करल बा । अब्बेसम एक हजार दुई सय पिन्ट रगत खपत हुइलेसे फेन संघसंस्थासे ५०७ पिन्ट किल रगत दान हुइल बा ।
बाँकी रगत रेडक्रस, बिरामीके आफन्त ओ दातासे आपूर्ति करे परल रक्त सञ्चार संयोजक बिनाडी बटैलै । गैल बरस रेडक्रससे ९०० पिन्ट रगत खपत करल रहे । रेडक्रस सोसाइटीसे रक्तदान करक लाग नागरिकहे आह्वान करलेसे फेन नेगेभिट गु्रपके रगत सञ्चित कैना नीति बनैले बा ।
नेगेटिभ ग्रुपके रगत जौन बेला आवश्यक परठ् उहे बेला दाताहे बोलाके निकर्ना करल बा । रेडक्रससे शिक्षक, कर्मचारी ओ व्यवसायीके रगत पहिचान कैके दाताके सूची तयार करल बा ।
‘‘रगत दान महादान कहिके बुझल कुछ युवा ५७ चोसम रगत दान करले बाटै कलेसे कुछ यी वा ऊ बहाना बनाके रगत डेहे नाइ मन्ठै’’, रेडक्रसकर्मी चेतमान केसी कहलै, ‘‘रगत आपूर्ति सहज होए कहिके रेडक्रससे स्थानीय सरकारसे मिलके निःशुल्क रगत आपूर्ति करे लागल बा ।
टीकापुर नगरपालिका ओ जानकी गाउँपालिकाके कुछ वडा आपन नागरिकहे निःशल्क रगत उपलब्ध करैना रेडक्रससे सम्झौता करले बाटै । अइसीक सम्झौतानुसार जौन वडाके नागरिक रगत प्रयोग करले बाटै ओकर लागत रकम उहे वडा एकमुष्ट तिर्ना करल बाटै ।
टीकापुर नगरपालिकासे नगरवासीहे चाहना रगत ओ सुत्केरीहे एम्बुलेन्स सेवा निःशुल्क बनाइल बा । अइसीक सेवा लेहलहुक्रनके एकमुष्ट रकम नगरसे रेडक्रसहे बुझैना करल बा । चालु बरसके अब्बेसम सुत्केरीके लाग दुई सय पिन्ट रगत खपत हुइल जनाइल बा । कलेसे एम्बुलेन्स सेवा करीब ३०० सुत्केरी लेले बाटै ।