सुदूरपश्चिम स्पोर्टस अवार्डहे बजेट

पहुरा समाचारदाता
धनगढी, १७ असार । नेपाल खेलकुद पत्रकार मञ्च कैलालीसे सुरु करल सुदूरपश्चिम स्पोर्ट्स अवार्डके लाग धनगढी उपमहानगरपालिकासे बजेट विनियोजन करले बा । धनगढी उपमहानगरपालिकासे अइना आर्थिक बर्ष २०७७/७८ के लाग स्पोर्टस अवार्डके लाग बजेट विनियोजन करल हो ।
धनगढीके उपमेयर सुशिला मिश्रभट्ट पाचौं नगर सभा मार्फत आर्थिक वर्ष २०७७/७८ के बजेटमे स्पोर्ट्स अवार्डहे बजेटके व्यवस्था मिलाईल जानकारी डेली । ‘उत्कृष्ट वर्ष खेलाडी छनोट करके अवार्ड प्रदान कैना आवश्यक बजेट व्यवस्था मिलाइल बा ।’ उपमेयर भट्ट कहली– ‘यी पाली कोरोनामे अधिकांश कार्यक्रम केन्द्रित हुइल ओरसे कम बजेट विनियोजन हुइल बा । अइना बर्षसे बजेट वृद्धि करटी स्पोर्टस अवार्ड कार्यक्रमके बजेटहे निरन्तरता डेबी ।’
नेपाल खेलुकद पत्रकार मञ्च कैलालीसे अघिल्का वर्षसे सुदूरपश्चिम स्पोर्टस अवार्डके आयोजना करटी आइल बा । उपमहानगरपालिकासे स्पोर्ट्स अवार्डके लाग बजेटमे समावेश करके विनियोजनके व्यवस्था मिलाइल सुदूरुपश्चिमे यी सम्भवतः पहिल हो । स्पोर्ट्स अवार्डके लाग एक लाख पचास हजार रुपैयाँ छुट्ट्याइल बा ।
धनगढी उपमहानगरपालिकासे उपमहानगरके केल नइहुके समग्र प्रदेशके प्रतिनिधित्व कैना खेलाडीके हौसला प्रदान कैना पुरस्कार ओ सम्मानके व्यवस्था करटी आइल मेयर नृप वड बटैलै । नीति तथा कार्यक्रममे समावेश करके पमहानगरपालिकासे ओकर लाग बजेट विनियोजन करके स्पोर्टस अवार्डके आयोजना सुरु करलमे स्थानीय सरकारके ओरसे सहयोग करल उहाँक कहाई बा । ‘यहाँक प्रदेश सरकारसेफे कुछ नइकरल कना बाट आइल । और स्थानीय तहसेफे सहयोग नइकरल पैनु ।’ मेयर वड कहलै– ‘मजा काममे सक्कु जे सहयोग ओ साथ डेहे परठ कना स्पोर्टस अवार्डके लाग बजेट विनियोजन करल हो । प्रदेशके खेलाडीके लाग करल कार्यक्रममे प्रदेश सरकार ओ स्थानीय सरकारहेफे सहयोगके लाग आग्रह करटी ।’
प्रदेश सरकारसे गैल अगहनमे आयोजित १३ औं दक्षिण एसियाली खेलकुद प्रतियोगितामे सुदूरपश्चिम प्रदेशके प्रतिनिधित्व कैना खेलाडीहे नगद सहित सम्मान कैना तयारी करले बा । मने अपने आयोजना सुरु करल स्पोर्टस अवार्ड सरकारसे करे पर्ना अपनेहुक्रे आयोजना करेबेर फे कौनो स्थानीय तह ओ प्रदेश सरकारसे सहयोग नइकरल नेपाल खेलकुद पत्रकार मञ्च कैलालीके महासचिव प्रदीप पाठक बटैलै । ‘सुदूरपश्चिमके प्रतिनिधित्व कैना खेलाडीहुकनहे हौसला बह्रैना स्पोर्टस अवार्डके सुरुवात करेबेर आजसम एक रुपैयाँ फे प्रदेश सरकारके ओर सहयोग हुइल नइहो । अधिकांश स्थानीय तहसे सहयोग करले नइहुइट मने हम्रे यी अवार्डहे बर्सेनि आयोजना कैना पाछे नइहटब ।’ महासचिव पाठक कहलै– ‘धनगढी उपमहानगरपालिकासे स्पोर्टस अवार्डके लाग बजेट विनियोजन करलमे धन्यवाद डेहे चाहठी, यिहीसे हमार हौसला बह्रल बा ।
नेपाल खेलकुद पत्रकार मञ्चसे देशके प्रतिनिधित्व करटी अन्तर्राष्टिय क्षेत्रमे उत्कृष्ट प्रदान कैना खेलाडीनहे स्पोर्टस अवार्ड मार्फत सम्मान करटी आइल बा । और स्थानमे प्रदेश स्तरीय अवार्ड कार्यक्रम आयोजना हुइटी आइलमे उहाँक प्रदेश सरकारसे ५ से १० लाख रकमसम विनियोजन करटी आइल बाटै । मने सुदुरपश्चिम सरकारसे सहयोगके नाउँमे एक रुपैयाँफे नइडेहल महासचिव पाठक गुनासो करलै ।