निर्वाचित महिला जनप्रतिनिधिहुकनके लाग रुपान्तरणकारी राजनीतिक नेतृत्व तथा निर्वाचन तयारी सम्बन्धी प्रशिक्षण

पहुरा समाचारदाता
धनगढी, ११ कुवाँर । निर्वाचित महिला जनप्रतिनिधिहुकनके लाग रुपान्तरणकारी राजनीतिक नेतृत्व तथा निर्वाचन तयारी सम्बन्धी पाँच प्रशिक्षण धनगढीमे सम्पन्न हुइल बा ।
ओरेक नेपालके आयोजनाके यिहे कुवाँर ७ गतेसे सुरु हुइल तालिम अँटवारके रोजसम चलल तालिमके समापन कार्यक्रमके प्रमुख अतिथि सुदूरपश्चिम प्रदेश सामाजिक विकास मन्त्री सन्तोष शर्मा रहल रहिट ।

कार्यक्रममे सम्बोधन करटी उहाँ महिलाहे आघे बह्रना भारी चुनौतीके सामाना करेपर्ना बटैली । कौनोफे महिला आघे बह्रम कना पहिले अपनही तयार हुई परठ, उहाँ कहली,–महिलाहुक्रे सोचलहस ठाउँ नैपाके विछिप्ट हुके राजनीतिसे दुर हुइटी डेखल बा । महिलाहुक्रे पार्टी भिटर वा सक्कु ओर मन जिटके जाई नैसेक्लेसे राजनीतिक रुपमे आघे बह्रना कर्रा बा ।

मन्त्री शर्मा कहली, राजनीति कहल समाज सेवा हो । पैसाके राजनीति कैना चिज नैहो । आघे बह्रना पारिवारिक सहयोग सबसे भारी बा । मानसिकता, राजनीतिक रुपमे तयार हुई परठ । सामाजिक सजालसे महिलाहे मानसिक हिंसा डेहल बा । क्षमतासे अव्वल बाटी कलेसे आघे बह्रे सेक्बी ।
कार्यक्रममे सहभागी कमला चौधरी पाँच दिने तालिमसे तथ्य ओ प्रमाणके साथ आघे बह्रना बाट सिखल बटैली । स्थानीय सरकार संचालन ऐनके बारेमे विस्तृत रुपमे जाने पाइलफे उहाँ बटैली ।

तालिममे सहभागी निर्मला संज्याल बास्तविक धारणा विना योजना ल्याने नैपर्ना बल्की तथ्य ओ प्रमाणके आधारमे आघे बह्रे पर्ना बाट जानल बटैली । निर्वाचन आचारसहिताबारे, राष्ट्रिय सभामे महिला कैसिक निर्वाचित हुइठै कना बाट, सामानुपतिक सहभागिताके बाट सिखल बटैली ।
ओस्टेक सहभागी सरितादास नेपाली महिलाहुक्रे नेतृत्व तहसे कैसिक पाछे परल बाट सिखल बटैली । महिलाहुक्रे सिमित कोटमे सिमिट हुइना बाट, उप्पर तहमे पुगे नैसेक्ना कारण जाने पाईल बाट सिखल बटैली ।

महिलाहुक्रे आघे बह्रेक लाग आपन सुरक्षा योजना बनाके आघे बह्रना बाट जानल बटैली । घोषणापत्र बनाई योजना बनाके आघे बह्रना बाट सिखल बटैली ।
उ तालिममे पाँच जिल्लाके ३१ जाने महिलाहुक्रे सहभागितामे तालिम लेहल रहिट । जेम्ने पहिल दिन नेपालके राजनीति परिदृश्य, सघीय लोकतान्त्रिक शासन व्यवस्था ओ स्थानीय सरकार, महिलाके राजनीतिक सभागिता, संर्वधानिक अधिकार ओ लैगिक समानता, रुपान्तरणकारी राजनीति नेतृत्व ओ महिला नेतृत्वके लाग आवश्यक दक्षता, व्यक्तिगत नेतृत्व यात्रा, राजनीतिक दृष्टिकोण ओ नेतृत्व विकास योजनाबारे बाट सिखागिल रहे ।

दुसरा दिन रुपान्तरणकारी नारी, महिलावादी तथा नैतिक नेतृत्वके सिद्धान्त, सार्वजनिक नेतृत्वमे जावफदेहिता, पारदर्शिता, सदाचारिता ओ सुशासन, निर्णय, वार्ता, द्वन्द समाधान तथा सहमति निर्माण, भावानात्मक वृद्धिमता उत्थानशिलता, राजनीतिक आत्मविश्वास तथा नेतृत्व मार्गदर्शनके बाट सिखागिल रहे ।

टिसरा दिन नेपालके निर्वाचन प्रणाली, निर्वाचन कानून तथा राजनीनिक दल, राजनीतिक रणनीति दलसंगके संलग्नता तथा उम्मेदवार मनोनयनके तयारी, निर्वाचन अभियान योजना, निर्वाचन क्षेत्रके नक्साङकन तथा स्रोत परिचालन, निर्वाचन अभियान व्यवस्थापन, कोष संकलन तथा स्वयसेवक परिचालनके बाट सिखागिल रहे ।

ओस्टे करके चौठा दिन स्थानीय सरकारमे कार्यकारी नेतृत्वमे भूमिका तथा जिम्मेवारी, लैगिक उत्तरदायी तथा समावेशी शासन, लैगिक समानता तथा सामाजिक समावेशीकरण ओ लैगिक उत्तरदायी बजेट, प्रमाणमे आधारित योजना, सार्वजनिक वित्त, सेवा प्रवाह तथा सामाजिक जवाफदेहिता, सरोकारवालासंगके संलग्नता, संञ्जाल निर्माण, गठबन्धन निर्माण तथा समावेशी नीति नेतृत्वके बाट सिखागिल रहे ।

ओस्टेक करके पाँचौ दिनमे प्रमाणमे आधारित नेतृत्व, नीति विश्लेषण तथा घोषणापत्र विकास, राजनीतिक सञ्चार सार्वजनिक बक्तृत्व, संचारमाध्यमसंगके संलग्नता तथा वहसके सीप, डिजिटल अभियान, सामाजिक संजाल, गलत सूचनाके पहिचान ओ प्रतिरोध तथा राजनीतिमे महिला विरुद्ध हुइना हिंसा, व्यक्तिगत राजनीति नेतृत्व तथा निर्वाचन तयारी कार्ययोजना समिक्षा तथ समापनके बाट सिखागिल रहे ।

पाँच दिने तालिममे प्रशिक्षण टेकनाथ सापकोटा, इशा घिमिरे डेहल रहिट । कलेसे सहजीकरण ओरेक प्रदेश संयोजक सपना थापा ओ जिल्ला संयोजक गीता चौधरी करल रही । तालिम समापन कार्यक्रम सरिता दियालीके अध्यक्षतामे हुइल रहे ।