सडकमे बास बैठ्टी आइल डाइछावाके उद्धार

पहुरा समाचारदाता
धनगढी, २३ असार । कैलालीमे सडकके बास रहल डाइछावाके उद्धार करल बा ।
‘खाइ पुगे, डेहे पुगे’ अभियानके विशेष पहलमे जोशीपुर गाउँपालिका अन्तर्गत जोशीपुर बजारमे बिगत ३ बरससे सडकमा बास करटी आइल ५० वर्षिया जगतरा परियार ओ १० वर्षिय पारस परियारके उद्धार करल हो ।
बजार तथा गाउँमे मग्टी दैनिकी चलैटी आइल डाइछावाके जीवन लकडाउनके कारण थप समस्यामे परल रहे । अतिबिपन्न परियारहे राहत वितरण कैना क्रममे खाइ पुगे, डेहे पुगे अभियानके अभियन्ता आलोकजंग साउद उहाँहुक्रनके बारेम समाजिक संजालमार्फत भिडियो सार्वजनिक करल रहिट ।
भिडियो सार्वजनिक हुइलसंगे स्वदेश तथा विदेशमे रहल नेपालीहुक्रनके सहयोग जुटल रहे । उहे सहयोग ओ गाउँपालिकाके समन्वयसे सोम्मारके उहाँहुक्रनके उद्धार करल समाजिक अभियन्ता साउद जानकारी डेलै ।
अभियन्ता साउदके अनुसार उहाँहुक्रनहे गास, बास ओ कपासके वयवस्था करल बा । हाल बजारमे भत्कल हाटबजारके भवनहे मर्मत कैके उहाँहुक्रनके व्यवस्थापन करल ओ स्थानीय तहसे जग्गा उपलब्ध करैलेसे उहाँहुक्रनके लाग घर निर्माण कैना जनाइल बा ।
जोशीपुर गाउँपालिकाके अध्यक्ष राम कृष्ण चौधरी आगामी दिनमे उहाँहुक्रनके हेरचाहके जिम्मा गाउँपालिका लेना आश्वासन डेहल समेत अभियन्ता साउद बटैलै । गोसिया बेपत्ता हुइलपाछे बेसहारा बनल उहाँहुक्रे मानसिक तनावसे छावाहे लेके घरसे निक्रल ओ नातपातहुक्रे फेन बेवास्ता करल जनाइल बा ।