हत्कडीसहित भागल युवा पक्राउ

पहुरा समाचारदाता
धनगढी, २६ असार । अपन बुडीक हत्या आरोपमे पक्राउ पकरके प्रहरी थुनासे हत्कडी सहित भागल युवक पक्राउ परल बाटै ।
बुडीक हत्याके आरोपमे बुधके सकारे पक्राउ परल चुरे गाउँपालिका वडा नम्बर ६ भावरके २३ बर्षीय गणेशबहादुर ऐर बुधके साँझ प्रहरी नियन्त्रणमे रहल बेला हत्कडी सहित भागल रहिट ।
उहाँहे विफेक रात सहजपुर क्षेत्रसे पक्राउ करल बा । उहाँहे पक्राउ कैना जिल्ला प्रहरी कार्यालयके प्रहरी नायव उपरिक्षक प्रतिक बिष्टके नेतृत्वमे भारी संख्यामे प्रहरी परिचालन करल रहे । पक्राउ परल उहाँहे विफेक रात जिल्ला प्रहरी कार्यालयमे नानल बा ।
ईलाका प्रहरी कार्यालय फल्टुडेके नियन्त्रणमे रहल ऐर बुधके साँझ खाना खैना बेला हत्कडी सहित भागल रहिट । ऐर ७५ बर्षीया बुडी पार्वतीदेवीके हत्या आरोपमे बुधके सकारे पक्राउ परल रहिट ।