विद्यालयसहित संयौं घरधुरी उच्च जोखिममे
पहुरा समाचारदाता
भजनी, ११ सावन । कैलाली जिल्लाके भजनी नगरपालिका–३, कुसुमघाटस्थित दुर्गा माध्यमिक विद्यालयसहित आसपासके पूरा वस्ती कन्द्रा लडियाक् कटानके उच्च जोखिममे परल बा ।
कटान नियन्त्रणके लाग असारके ओरौनीओहोर हतारहतारमे बनाइल तटबन्ध भस्कलपाछे लडियाक् धार विद्यालयसहित वस्तीओहोर सोझरलपाछे उच्च जोखिममे परल हो । आब उ कन्द्रा लडिया ओ विद्यालयके दुरी जम्मा ५ से ८ मिटर रहल स्थानीय आरती चौधरी बटैली । कटान रोकथाम तत्काल नैहुइलेसे विद्यालयके भौतिक संरचना पुहाके लैजिना कहिके स्थानीयहुक्रे चिन्ता व्यक्त कर्ले बाटै ।
लडियक् उ जोखिम क्षेत्रमे जलस्रोत तथा सिचाइँ डिभिजन कार्यालय धनगढी असारमे तटवन्ध निर्माण करल रहे । मने निर्माण सम्पन्न हुइल एक हप्तामे तटबन्ध भस्कलपाछे विद्यालयसहित बस्ती उच्च जोखिममे परल उहाँ बटैली ।
स्थानीयके अनुसार कुसुमघाटके १ सय २२ घरधुरी उच्च जोखिममे ओ लग्गे रहल कन्हैयापुरके १ सय ७३ घरधुरी फेन कटानसे प्रभावित हुइल बा । कलेसे, कटान क्षेत्रसे १० मिटरके दुरीमे रहल सशस्त्र प्रहरीके बेस क्याम्प कुसुमघाट फेन जोखिममे परल बा ।
असार २८ गते बनल तट्वन्ध सावन ३ गते भस्कल हो । असार ५ गते जलस्रोत तथा सिचाइँ कार्यालय धनगढीसे २८ लाख बजेटमे तट्वन्ध बनैना सम्झौता हुइल उपभोक्ता समिति अध्यक्ष हिरासिह बोहरा बटैलै ।
आर्थिक बरसके अन्तिम समयमे सम्झौता हुइल लक्ष्य अनुसार काम करे नैसेकल बोहरा बटैठै । ढिला हुुइल सम्झौताके कारण १६ लाख रकम बरावरके किल काम हुइल अध्यक्ष बोहराके कहाइ बा । बर्खामे काम शुरु हुइल कारण पानी बह्रके ३० मिटर काम नैहुइलपाछे कान्द्रा लडियाक् कटान धमाधम हुइटी रहल स्थानीय बटैठै ।
हाल स्थानीयबासी ओ सशस्त्र प्रहरीके प्रयासमे लडिया कटान नियन्त्रणके प्रयास हुइटी रहल बा । भजनी नगरपालिका कट्टा उपलव्ध कराइलपाछे माटी भरके बैकल्पिक लडिया कटान रोकथामके प्रयास हुइटी रहल बा ।
भजनी नगरपालिका वडा ३ के वडा अध्यक्ष विक्रम चौधरी लकडाउनके कारण डेखैटी ठेकडरुवा समयमे काम नैकरल बटैलै । असारमे आके काम करलपाछे तटबन्ध दिगो नैहुइल वडा अध्यक्ष चौधरीके कहाइ बा । पक्की तटबन्ध काम नैकरलपाछे कटान रोकथामके लाग स्थानीय ओ सशस्त्र प्रहरीके संयुक्त प्रयाससे बाँस, झालापाटासे जैविक तट्वन्ध बनैना काम हुइटी रहल बटैलै ।
वडाध्यक्ष चौधरीके अनुसार उ लडिया कटान क्षेत्रमे तटबन्ध निर्माणके लाग जलस्रोत तथा सिचाई डिभिजन कार्यालयसे २ करोड ७४ लाखके समझौता करगिल बा । विद्यालय ओ मानव वस्ती बचाइक लाग जैविक तटबन्ध बनैना काम हुइटी रहल बटैटी उहाँ बर्खा ओरैटी किल फेरसे पक्की तटबन्ध बनैना कामके सुरुवात कर्ना जानकारी डेलै ।
