सुदूरपश्चिममे २३ जाने संक्रमिट ठप्लै
पहुरा समाचारदाता
धनगढी, १८ सावन । सुदूरपश्चिम प्रदेशमे अँटवारके रोज २३ जाने कोरोना संक्रमिट ठपल बाटै ।
सेती प्रादेशिक अस्पतालके प्रयोगशालामे कैगिल परिक्षणमे २२ जाने कैलाली ओ एक जाने बैतडी करके २३ जनहनमे कोरोना संक्रमण पुष्टि हुइल हो । सेती प्रादेशिक अस्पतालके सूचना अधिकारी दिलिपकुमार श्रेष्ठसे जनाइल अनुसार पछिल्का २४ घण्टामे २ सय ३८ जनहनमे करल परिक्षणमे २३ जनहनमे कोरोना संक्रमण विल्गाइल बा ।
लौवा ठपल संक्रमिट धनगढीके २ पुरुष, बैतडी पाटन, गोदावरी, घोडाघोडी–१, जोशीपुर–१ के मे एक/एक जाने पुरुष, मोहन्याल–५ कैलालीमे दुई पुरुष, बर्दगोरिया–५ कैलालीमे तीन महिला पाँच पुरुष रहल बाटै कलेसे टीकापुर कैलालीमे दुई महिला पाँच पुरुषमे कोरोना संक्रमण पुष्टि हुइल सूचना अधिकारी श्रेष्ठ जनैलै ।
सेती प्रादेशिक अस्तपतालके प्रयोगशालामे अब्बेसम १७ हजार पाँच सय ३४ जानेक पीसीआर विधिसे चेकजाँच करलमे १६ हजार ९३ जानेक निगेटिभ ओ १४ सय ४१ जानेक पोजेटिभ रिपोर्ट आइल उहाँ जनैलै ।
