थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २२ अगहन २६४६, बिफे ]
[ वि.सं २२ मंसिर २०७९, बिहीबार ]
[ 08 Dec 2022, Thursday ]

कोरोना समुदायस्तरमे पुगल कि, सावधान हुई !

पहुरा | १९ श्रावण २०७७, सोमबार
कोरोना समुदायस्तरमे पुगल कि, सावधान हुई !

लकडाउन खुललसंगे सुदूरपश्चिम प्रदेशमे कोरोना संक्रमणदर घटेक छोरके उल्टे बह्रटी गैल बा । पूर्वतयारी बिना एकैचोट्टे लकडाउन खुला कैना, सर्वसाधारण कोरोनाप्रति वेवास्ता करटी जैना ओ सरकारसे कानमे तेल दारके बैठल कारण कोरोना संक्रमण समुदायस्तरमे फैलल की कना जैसिन तथ्याङकसे डेखा परे लागल बा । एक अठुवार यहोर देश भरके कोरोना संक्रमण दर हेरेबेर सुदूरपश्चिममे संक्रमण वृद्धिदर उच्च रहल बा । ओत्र केल नाही जे घरेसे बाहेर नइनिकरठ ओइनमे समेट संक्रमण विल्गाइ लागलपाछे कोरोना समुदायस्तरमे पुगल की कना हस भान हुई लागल बा । सेती प्रादेशिक अस्पतालके प्रयोगशालामे कैगिल परिक्षण तथ्याङक हेरेबेर सावन १२ गते दुई बरसके बच्चा, सावन १३ गते सात महिनाके बच्चा, एक, दुई ओ पाँच बरसके बच्चा, सावन १४ गते दुई, तीन, सात ओ दश महिनाके बच्चा, दुई, चार बरसके बच्चा, सावन १६ गते अठारा महिनाके बच्चा, सावन १७ गते नौ महिनाके बच्चा, दुई बर्ष बच्चामे कोरोना संक्रमण पुष्टि हुइल बा, कलेसे सावन १८ गतेक तथ्याङक हेरेबेर एक बरससे ११ बरस टरेक चार ठो बच्चामे कोरोना संक्रमण डेखा परल बा ।

यी तथ्याङ्क हेरेबेर दुई महिनाके बच्चा टे बजार घुमे नइजैही, अटरा केल नाही कबु–कबु घरसे बाहेर निक्रना बुढाइल मनैनमेफे कोरोना संक्रमण विल्गाइल बा । पहिले कोरोना और देशसे आइल मनैनमे केल डेखा परल रहे, ओइने क्वारेन्टिनमे बैठके घर गैल रहिट । क्वारेन्टिनसे घर गैल ६८ जनहनमे कोरोना पुष्टि हुइल यी बझाङके भर्खर दुई दिन आघेक घटना हो । सुदूरपश्चिम प्रदेशके टमान जिल्लाके एक्के स्थानीय तहके एक वडामे केल दर्जनौ व्यक्तिनमे संक्रमण डेखा परटी गैल बा, ओ संक्रमण बृद्धिदरफे उच्च हुइना क्रम जारी बा, अइसिक हेरेबेर कोरोना संक्रमण समुदायस्तरमे पुगल की कनाहस लागे लागल बा, संक्रमणदर बह्रटी गैलपाछे सुदूरपश्चिम प्रदेशके एक दुई स्थानीय तहहुक्रे कुछ वडा–गाउँमे निषेधाज्ञ जारी करे बाटै, मने प्रदेश सरकारहे कुछ मतलब नइरहल विल्गाइठ । चैत ११ गतेसे सुरु हुइल लकडाउन १ सय २० दिनसम जारी हुके सक्कु क्षेत्र ढेर प्रभावित हुसेकल बा ।

अब्बे यी प्रदेशमे कोरोना संक्रमण दर उच्च हुइटी गैल बा, एकफाले लकडाउन कैडेलेसे भर्खर खुलल व्यापार, व्यवसाय फेरसे धारापमे परे सेकी । लकडाउन खुललपाछे यहोर उहोर भीडभाड कैना, मास्क नइलगैना, स्वास्थ्य मापदण्ड पालना नइकैना, अपने जोखिममे रहना और जनहनहेफे जोखिममे पर्ना काम हुइटी बा, गृहमन्त्रालयसे सार्वजनिक स्थलमे मास्क नइलगुइयाहे १ सय रुप्या जरिवाना कैना कना नियम कार्यान्वयन नइहुइल डेखाजाइठ । टबमारे कोरोना संक्रमण समुदायस्तरमे नपुगे कहटी प्रदेश सरकार ओ स्थानीय सरकार बाहेरसे आइल मनैनहे क्वारेन्टिनमे अनिवार्य बैठाके स्वाब लेना, परीक्षणके दायरा बढैना, राज्यसे सक्कुहुनहे मास्क लगैना अनिवार्य करेबेर पर्ना, पसलमे कोई मास्क नइलगाके अइलेसे उहीसे रोक्ना उपाय अपनाई जरुरी रहल बा, कलेसे प्रदेश ओ स्थानीय सरकार समय सोच्के सावधानी अपनैना जरुरी बा ।

जनाअवजको टिप्पणीहरू