‘पागल मन’ ओ ‘प्रेम गीत’ अइना तयारी

पहुरा समाचारदाता
कैलाली, २८ भदौ । कोरोना भाइरस (कोभिड–१९) तथा लकडाउनसे कुछ समय थारु म्युजिक भिडियो निर्माण पक्षहे प्रभाव परलेसे फेन लकडाउन कुछ फोँफर हुइलपाछे फेरसे म्युजिक भिडियो धमाधम निर्माण हुइटी रहल बा ।

लौव लौव थारु गीतसंगीत बजारमे आइलसंगे म्युजिक भिडियो फेन धमाधम निर्माण हुइटी रहल बा । अब्बे अँठ्वारमे ३÷४ ठोसमके थारु म्युजिक भिडियो छायांकन हुइट िरहल राष्ट्रिय थारु कलाकार मञ्च सुदूरपश्चिम प्रदेश सचिव स्वरुप चौधरी जानकारी डेलै ।

म्यूजिक भिडियो विन्दास मिडिया, हमार म्युजिक बगिया, सीएस फिल्मस् लगायत यूट्युब च्यानलसे बजारमे अइटी रहल बा । यिहे बिच थारु म्युजिक ‘पागल मन’ के फेन छायांकनके कार्य फेन सम्पन्न हुइल बा । म्युजिक भिडियोमे थारु कलाकारिता क्षेत्रके सुपर मोडल बीर चौधरी, सुनिता चौधरी, सुजु राजवंशी लगायत कलाकार रहल बाटै ।

गायक समीक्षा चौधरीके गीत ओ स्वर रहल बा । म्युजिक भिडियोके डाइरेक्सन सुधराम दहित करले बाटै । भिडियोके छायांकन ओ एडिट शाहिल चौधरीके रहल बा । भिडियोके छायांकन कैलारी गाउँपालिकाके धार्मिक पर्यटकीय क्षेत्र वनदेवी मन्दिर, सुख्खड बजार लगायत ठाउँमे हुइल बा । म्युजिक भिडियो कुँवार हप्ता बजारमे अइना निर्माण पक्ष जनैले बा ।

इ म्युजिक भिडियो संगे ‘प्रेम गीत’ के फेन छायांकनके फेन कार्य सम्पन्न हुइल बा । मोडल बीर चौधरी, दिपिका चौधरी, सुनिता चौधरी लगायत कलाकार रहल म्युजिक भिडियोके गीतमे केके राज ओ समीक्षा चौधरीके स्वर रहल बा ।

भिडियोके डाइरेक्टरमे सुधराम दहित, असिस्टेन्ट डाइरेक्टर आदर्श महतो रहल बाटै । भिडियो छायांकन तथा एडिटमे शाहिल चौधरी रहल बाटै  । कैलालीके चिसापानीके पीतमारी, सुख्खड बजारमे रहल च्वाइस इन होटलमे छायांकन हुइल भिडियो कुँवार १ गते बजारमे अइना जनाइल बा ।

ओस्टके थारु म्युजिक भिडियो ‘आरकी पार’ के छायांकन कार्य पुरा होके एडिटिङके कार्य हुइटी रहल जनाइल बा । बालकृष्ण, सुयोग चौधरी, रञ्जिता बखरिया, पार्वती राना लगायत कलाकार रहल म्युजिक भिडियोके राजापुर बर्दिया लगायत क्षेत्रमे छायांकन करल बा ।

शब्द संगीत सुुवेश कठरियाके गीतमे आनन्द महतोके स्वर रहल बा । म्युुजिक भिडियोके छायांकन ओ एडिट शाहिल चौधरीके रहल बा । आदर्श महतो डाइरेक्सन करल म्युजिक भिडियो कुवाँर पहिल अँठ्वार बजारमे अइना जनाइल बा ।