थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ अगहन २६४६, मंगर ]
[ वि.सं १३ मंसिर २०७९, मंगलवार ]
[ 29 Nov 2022, Tuesday ]

बाल दिवस ओ कोभिड–१९ के प्रभाव

पहुरा | २९ भाद्र २०७७, सोमबार
बाल दिवस ओ कोभिड–१९ के प्रभाव

बाल दिवस एक अइसिन दिन हो जहाँ लर्कनके अधिकार ओ शिक्षाहे बढावा डेहठ । विश्व बाल दिवस सर्वप्रथम सन् १९५४ मे अन्तर्राष्ट्रिय बाल दिवसके रुपमे स्थापना हुइल ओ हरेक बरसके २० नोभेम्बरमे अन्तर्राष्ट्रिय एकता, विश्वभरके बालबालिकाहुकनमे चेतना जगैना ओ बालकल्याण सुधार करेक लाग मनाजाइठ ।

मने, फरक फरक देश फरक फरक दिनमे बाल दिवस मनाइल देख परठ । बाल दिवस भारतके प्रथम प्रधानमन्त्री ‘जवाहरलाल नेहरू’ के जन्म १४ नोभेम्बर १८८९ से मनाजाइठ । उ दिनसे बाल दिवस मनाजाइटा । बाल दिवस भारतमे पहिलचो सन् १९५४ मे मनागिल । बाल दिवस ‘जवाहरलाल नेहरू’से स्थापित करल रहे । उहाँ बाल बच्चन्हे अपन स्नेहाके लाग परिचितरहैं । लर्कनप्रतिके उहाँक् प्रेमके कारण उहाँहे ‘चाचा नेहरू’ कहिके चिन्हजाइठ । टबेमारे आब हम्रिहिनहे पटा बा, कि यी भारतमे पहिलचो मनागिल रहे ।

भर्खर हम्रे भारतके बारेमे बाट करली, आब अमेरिकाके बारेमे बाट करी । अमेरिकामे बाल दिवसहे गुलाब दिवस कहिजाइठ । ओ, यी पाछे सन् २००१ मे राष्ट्रपति बुशजे जुनके पहिल अँट्वारहे राष्ट्रिय बाल दिवसके रूपमे घोषणा करलै ।

आब कोरियाके बारेमे बाट करी, बाल दिवस कोरियामे सन् १९२३ मे ‘ब्यांग जेयलन्ग ह्वान’से परिचय करल रहे । उहाँ बाल साहित्यके लेखक ओ बालअधिकारके लराकु हुइट । कोरियामे, लर्का मजा व्यवहार करठै ओ ओइने अपन बुजुर्गहुकनप्रति सहयोगी ओ सम्मान करठै । मै कोरियाके टमान ब्लग हेरनु, मै इमानदारी साथ कहे सेकम कि कोरियालीहुक्रे परिवार मैत्री बाटै ।

आब हमार देश नेपाल, बाल दिवस सन् १९९० मे ‘युएन कन्भेन्सन’से सुरु हुइल रहे । नेपाली क्यालेन्डरके अनुसार बाल दिवस भदौ २९ गते मनाजाइठ । यी दिन राष्ट्रिय बिदा रहठ । लर्कन्के कल्याणके रक्षा करना ओ ओइनके खुशी, सुरक्षित हुर्कना अवसर डेहेक लाग उजागर करेक लाग राष्ट्रिय बिदा डेजाइठ । हम्रे विशेष कार्यक्रममे भागलेके बाल दिवस मनाइ सेक्ठी काहे कि यी दिन लर्कनके लाग विशेष दिन हो । अभियानमे जाके, डाइबाबा फेन लर्कनसंग रहिके मनाइ सेक्ठै ।
हम्रे सुन्य बरससे लेके १५ वर्षसमहे लरका कठी, मने १५ वर्ष कलेक लर्का नैहोइ वयस्क हो । यी शारीरिक परिवर्तन ओ भावनात्मक विकासके समय हो । ओ १६ से लर्का किशोरावस्थाके रूपमे पुग्ठै ।

नेपालके बारेमे बाट करेबेर, यी एक विकासशिल देश हो ओ यी छोट देश हो ओ कोरियाके बारेमे बाट करल बा यी फेन एक छोट देश हो मने केवल फरक कोरिया एक विकशित देश हो ।

नेपाली लरकन्संग बाट करबो टे आइने अनुशासित बाटै मने कोरियाली लरकन्संग तुलना करलेसे ओइने अधिक अनुशासित, मजा व्यवहार ओ अन्य टमानमे मजा बाटै । मै यूट्यूवमे टमान सामाजिक प्रयोग भिडियो हेरनु ओ टमान लर्का आपनसे भारीहे सहयोग ओ सम्मान करट डेख्नु ।

मै नेपाल ओकोरियाके तुलना नैकरठु वा अइसिन फेन नैकनु कि नेपाली लर्का सम्मान नैकरठै, बुर्जकुहुकनहे सहयोग नैकरठै वा मजासंग व्यवहार करल नैहो । मै फेन एक नेपाली बच्चाहुँ ओ मै कहेक खोजल अत्रा किल हो कि हरेक कोरियन लर्का शिक्षित ओ परिवारमैत्री बाटै, टबमारे मोर विचारमे यी देशके विकास हुइल बा ।

यी लकबन्दी समय, हम्रे जानटी कोभिड–१९ से विश्व प्रभावित हुइल बा । टबेमारे हम्रे बाहेर जाइ ओ ताजा हावा लेहे सक्षम नैपाइठुइ । मै सोचटु कि सरकार का करटा ? कहे कि सयौं मनै कोभिड–१९ से मरटै ओ सरकार केवल उ दृश्य हेरके बैठल बा ।

हम्रे सामाजिक शिक्षामे बाल अधिकारके अध्ययन करली । ओमे शिक्षाके अधिकार, स्वतन्त्रताके हक, बँचे पैना हक, हेरचाह करना अधिकार, मायाके हक ओ और टमान अधिकार बा, आब हमार अधिकार कहाँ बा ? लर्का लकबन्दीके कारण शिक्षा नैपाइठुइट, ओइने स्वतन्त्र नैपाइठुइट, काहे कि ओइने अपन घरमे बन्दबाटै ओ टमान लर्का कोभिड–१९ के कारण मरटै, कहाँ बा हमार बाँचे पैना अधिकार ।

टमान वयस्कहुक्रे निराश बाटै, केवल वयस्क किल नाइ लर्का फेन निराश बाटै, दिमाग दुःखी बा ओ उमन्से एक मै फेन हुँ । मै घरे क्वारेन्टाइनमे रहट रहट झरकाह हुइल बाटु । टमान मनै क्वारेन्टाइनमे आत्महत्या करटै ।

हम्रे लर्का आब चिडियाखाना मेका जनावर हस बाटी । हम्रे जनावरके एक अंशजस्ते बनल बाटी । चिडियाखानामे जस्ते, पशुहुक्रे स्वतन्त्र नैरठै ओइने बस अपन पिञ्जरामे बन्द रठै । आब मै जन्नु कैद हुइल जनावरहे कैसिन लागठुइ ? ओइने फेन हम्रिहिनहस बाहेर जाइ चहठै । ओ, सबसे महत्वपूर्ण बाट लर्का आधुनिक ग्याजेटमे अपन समय बर्बाद करटै । ओइने अपन दिमाग रचनात्मक चीजमे प्रयोग नैकरठुइट ओ ओइने मोबाइल फोन प्रयोग करटै । ओइनके दिमाग प्रक्रिया क्षति ग्रस्त हुइठ यदि ओइने बस ग्याजेट प्रयोग करलेसे । ओइनके दिमाग सृजनात्मक चीजमे प्रयोग नैकरठै ओ उपाछे रचनात्मकता गुमै ही ।

ऋष्टिणाके थप लेख
अटवारी ओ ‘भेवा’ पर्व
मोर गाउँ ओ गुरही

पह्रै नैपाके लरकनके भविष्य ध्वस्त हुइ सेकी । कुछ बच्चाहुक्रे अपन पुस्तक खोले नैसेकले हुइट । कहु अनलाईन कक्षा चलल बा । सरकार घोषणा करले बा कि अनलाइन कक्षा स्कूलमे पह्रलहस नियमित कक्षा हुइही । मने यहाँ टमान लर्का बाटै जेकर ठन ल्यापटप, मोबाइल फोन वा इन्टरनेट सुविधा नैहो ओ उचित प्राविधिक कौशल फेन नैहो । यहाँ टमान लर्का बाटै जो डुरके इलाकामे बाटै ओ ओइनहे का पह्रना वा लिख्ना पता नैहुइन ओइने अशिक्षित बाटै ओइनके भविष्य अन्धकार हुइ सेकी । टबे, आब मै इमान्दार से केहे सेकम कि नेपाल एक विकासशील देश हो ओ काहे यी एक विकसित देश नाइहो ? कैसिक पह्रना ? के उ प्रदान करी ? यदि कक्षा सञ्चालन समयमे बत्ती जाइ कलेसे काहुइ ? यदि लर्का अपन समस्याके कारण कक्षामे उपस्थित नैहुइहि टे ?

जस्टे स्कूलके समयमे, हम्रे केवल हमार संघरियनहे पुछे सेक्ठी कि हम्रे काल्ह का पह्रली, मने आब अनलाइन कक्षामे ओइने किहिहे बटैही ? ठिक बा, टोहान संघरिया सेकी, मने का टोहान अनलाईन कक्षामे टुहिनहे मजासंग व्याख्याकरी ओ शिक्षक टुहिनहे छुट्टे समय डेहे नैसेकम अपन संघरियासे पुछो कहि । हो, यी समस्या हुइ । आब, मै नैकहम कि अनलाइन कक्षा प्रतिबन्धित करे परल मने उहाँ टमान लर्का बाटै जेकरसंग आधुनिक ग्याजेट नैहो ।

मोर ठन टमान प्रश्न बा, आब के महिनहे यी प्रश्नके उत्तर डि ? यहाँ कोइ बा ?

जनाअवजको टिप्पणीहरू