कैलालीके ९ सहित सुदूरपश्चिमके १७ जनहनमे कोरोना पुष्टि

पहुरा समाचारदाता
धनगढी, ६ कुवाँर । सेती प्रादेशिक अस्पतालके प्रयोगशालामे हुइल परीक्षणमे कैलालीके नौँ सहित सुदूरपश्चिम प्रदेशके थप १७ जनहनमे कोरोना संक्रमण पुष्टि हुइल बा । पाछेक २४ घण्टामे दुई सय ८७ जनहनके कोरोना परीक्षण हुइलमे १७ जनहनमे संक्रमण पुष्टि हुइल हो ।

प्रादेशिक अस्पतालके सूचना अधिकारी दिलिप कुमार श्रेष्ठसे डेहल जानकारी अनुसार धनगढी उप–महानगरपालिकाके ५ जनहनमे संक्रमण पुष्टि हुइल बा । वडा नम्वर ३ के दुई, वडा नम्वर १, ८ ओ १७ के एकएक जनहनमे संक्रमण पुष्टि हुइल सूचना अधिकारी श्रेष्ठ बटैलै ।

ओहकान अनुसार कैलालीके गोदावरी नगरपालिका ओ चुरे गाउँपालिकाके दुईदुई जनहनमे फेन संक्रमण पुष्टि हुइल बा । सूचना अधिकारी श्रेष्ठ कञ्चनपुरके शुक्लाफाँटा नगरपालिका ओ पुनरवास नगरपालिकाके तीनतीन जाने, अछामके मेल्लेख–६ के एक जाने ओ ठेगाना नाइ खुलल् एक जनहनमे फेन संक्रमण पुष्टि हुइल जानकारी डेलै ।

प्रादेशिक अस्पताल अन्तरगतके कोरोना उपचार केन्द्रमे अब्बे ६ महिला ओ तीन पुरुष कैके नौँ जनहनके उपचार हुइटी रहल बा ।