फोहैटी स्कूल जाई लग्लै बालबालिका
लखन चौधरी
धनगढी, ७ कुवाँर । ५ महिनापाछे विद्यालयमे पैला टेकलपाछे कैलालीके कैलारी गाउँपालिका–६, बेनौलीस्थित अपरम्पार आधारभूत नमूना विद्यालयमे अध्ययनरत छात्रा रिया चौधरीक् खुशीक् सीमा नैहो ।
लम्मा विदा ओ कक्षा ४ से प्रथम स्थानसहित उत्तीर्ण होके कक्षा ५ मे पहिल पटक प्रवेश करे मिललपाछे उहाँक् मुहारमे पह्राईके रहर बहुट बह्रल बा ।
साढे ९ बजे विद्यालय पुगल उहाँ कहठी, ‘ढिउर दिनपाछे स्कूल आई मिलल बावै । मजा लगाटा । पह्रे ओ खेले पाके बहुट खुशी लागल ।’
उ विद्यालयके कक्षा ५ मे अध्ययरत छात्र सुशील चौधरी कोरोना महामारीसे जारी लकडाउनपाछे विद्यालय बन्द हुुइलपाछे घरेक् काममे आपन घरेक मनैन् सहयोग करटी आइल रहिट । कबु सँघारियान्से मच्छी मर्ना टे कब झालापाटा कट्ना काम करल बटैटी उहाँ विद्यालय खुल्न खबरसे आपनहे बरा खुशी लागल बटैठै ।
गाउँपालिकाके सक्कु विद्यालय लकडाउन अवधीमे क्वारेन्टाइन बनल रहे । क्वारेन्टाइन खाली कराइलपाछे विद्यालय सञ्चालनमे आइलपाछे विद्यार्थीहुकनमे मनोवैज्ञानिक डर भर छाइल बा ।
विद्यालयके कक्षा ८ मे अध्ययनरत छात्र अमर चौधरी भारतसे आइलहुकन विद्यालयमे राखलओरसे कुछ टे नाई हुई ? कना डर लग्टी रहल बटैठै ।
मने उ विद्यालयक प्रधानाध्यापक रामबहादुर चौधरी आवश्यक सुरक्षा सतर्कता अप्नाके विद्यालय सञ्चालनमे नानल बटैठै ।
उहाँ कहठै, ‘विद्यार्थीहुकन सामाजिक दूरी कायम करके बैठैटी आइल बाटी । मास्क ओ सेनिटाइजर तथा साबुन पानीसे हाठ समय समयमे धोइना कहिके विद्यार्थी सिखैटी आइल बाटी ।’
कैलालीके कैलारी गाउँपालिका कोभिड १९ बन्द रहल विद्यालय कुवाँर १ गतेसे सञ्चालनमे नन्ना निर्णय करल संगे उहाँके विद्यालय सञ्चालनमे आइल हो । गाउँपालिका स्थानीय सरकार सञ्चालन ऐन २०७४ तथा विद्यार्थी सिकाइ सहजीकरण निर्देशिका २०७७ अनुसार वैकल्पिक शिक्षा प्रणाली अप्नाके विद्यालय सञ्चालनमे नानल हो ।
जेकर लाग सक्कु विद्यालयहे कार्ययोजना पेश करेक लाग निर्देशन डेहल गाउँपालिकाके अध्यक्ष लाजुराम चौधरी बटैठै । कार्ययोजना अनुसार वैकल्पिक शिक्षा प्रणालीहे प्रभावकारी ढंगसे आघे बह्रैना अध्यक्ष चौधरीके कहाइ बा ।
सरकार बैकल्पिक प्रणालीसे विद्यार्थी सिकाइ सहजीकरण निर्देशिका २०७७ जारी कर्ले बा । जेकर आधारमे विद्यालय सञ्चालन करेक लाग निर्देशन जारी करल हो ।
अध्यक्ष चौधरी बैकल्पिक शिक्षा प्रणाली अप्नाके आवश्यक विधी, विद्यालय तथा विद्यार्थीहुकनके वर्गीकरण, विद्यालय व्यवस्थापन समिति तथा अन्य सरोकारवाला निकायसे छलफल अन्तरक्रिया करके सुरक्षाके मापदण्ड अप्नैटी विद्यालय सञ्चालन करल जानकारी डेलै ।
निर्देशिका अनुसार वैकल्पिक शिक्षा प्रणाली अन्र्तगत सिक्षण सिकाइ केन्द्र स्थापना ओ रेडियो, टीभी तथा अनलाइनसे कक्षा लेना विद्यार्थीहुकनके वर्गीकरण करके पठनपाठन करजिना बा ।
जिल्लाके दुर्गम गाउँपालिकाके रुपमे रहल कैलारी गाउँपालिकामे रेडियो, टेलिभिजन तथा अनलाइन प्रविधिके पहुँच नैरहलओरसे विद्यार्थीहुकनहे विद्यालयमे बलाइक पर्ना अवस्था रहल बटैठै गाउँपालिकास्थित सरस्वती माविके प्रअ बृद्धिप्रसाद सुवेदी ।
औरे पालिकामे तयारी
सरकारके निर्देशनपाछे जिल्लाके औरे स्थानीय तहस्थित विद्यालय फेन बैकल्पिक प्रणालीमार्फत विद्यार्थी सिकाइ सहजीकरणके तयारीमे जुटल बाटै ।
कैलालीके घोडाघोडी नगरपालिकाके नगरप्रमुख ममता प्रसाद चौधरी फेन विद्यालय सञ्चालन सुरु करल जानकारी डेलै ।
उहाँ कहलै, ‘विद्यालयमे दिनमे दुई ठो कक्षा किल सञ्चालन कर्ना मेरके विद्यार्थीहुकनहे हप्ताभरके गृहकार्य डेना गरी सञ्चालन कर्ना निर्देशन डेले बाटी । विद्यार्थीहुकनके बसाई व्यवस्थापन फैलहर बनाइक लाग कहले बाटी । सुरुमे विद्यार्थी कम अइटी बाटै । टबफेन विद्यालय क्रमशः सञ्चालन करटी जैना योजना बा ।’
कैलालीके धनगढी उपमहानगरपालिकाभिट्टरके विद्यालय फेन सञ्चालनके तयारी हुइटी रहल बा । कुवाँर १६ गतेसे बैकल्पिक शिक्षा प्रणाली अप्नाके पठनपाठन सञ्चालन कर्ना जनागिल बा ।
