बाढ प्रभावितहुकनके घर मर्मत ओ खाद्यन्न सहयोगके लाग नगद हस्तान्तरण

पहुरा समाचारदाता
धनगढी,८ कुवाँर । कैलाली जिल्लाके कैलारी गाउँपालिकास्थित वडा नम्बर ७ ओ ८ के बाढ प्रभावितहुकनके घर मर्मत ओ खाद्यन्न सहयोगके लाग नगद हस्तान्तरण कैगिल बा ।

डिसिएके आर्थिक सहयोगमे ड्राफ परियोजना अन्र्तगत बाढ प्रभावितहुकनके घर मर्मत ओ खाद्यन्न सहयोगके लाग दलित महिला अधिकार मञ्च (डिडब्लुआरएफ) नेपाल मार्फत १ सय ५० प्रति घरपरिवारहे जनही ८ हजार नौ सयके दरसे आइएमई मार्फत नगद हस्तान्तरण कैगिल हो ।

कैलारी गाउँपालिका वडा नम्बर ७ मे ३६ घरपरिवार ओ वडा नम्बर ८ मे १ सय १४ घरपरिवारहे घर मर्मत ओ खाद्यन्न सहयोग होए कहिके नगद हस्तान्तरण कैगिल डिडब्लुआरएफ के जिल्ला अध्यक्ष सावित्रा घिमिरे बटैली । बाढसे भत्कल घर मर्मत ओ खाद्यन्न खरिदके लाग नगद सहयोग डेहल उहाँ बटैली । उहे परियोजना मार्फत १ सय ५० घरधुरीके नल्का मर्मत, समुदायके सल्लाहमे आवश्यकता अनुसार उच्च नल्का बनैनाफे अध्यक्ष घिमिरे बटैली । ओस्टेक १०० जाने सुत्केरी, गर्भवती महिलाहुकनहे प्राथमिकता डेके सेनेटरी प्याड, किट बक्स सहयोग कैना उहाँ बटैली ।

हयोग गाउँपालिका ओ वडा कार्यालयसे तथ्याङक लेके डेहल अध्यक्ष बटैली । वडा नम्बर ७ के वाढ प्रभावितहुकन हसुलियामे रहल धिराज आइएमई सेन्टर मार्फत नगद हस्तान्तरण कैगिल बा । गाउँपालिका लाजुराज चौधरी, वडा नम्बर ७ के अध्यक्ष कमल चौधरी ओ डिडब्लुआरएफके नेपाल अध्यक्ष सावित्रा घिमिरे आइएमईसे निकारल नगद रुप्या बाढ पीडित रामकृष्ण चौधरीहे हस्तान्तरण करल रहिट । वडा नम्बर ७ नारायणपुर निवासी रामकृष्ण यी बरसके बाढसे घरेम क्षति पुगल, अन्नावाली पुहल लगाइल धानफे मुवाइल बटैलै ।

कैलारी गाउँपालिका वडा नम्बर ८ के वाढ पीडितहुकनहे मोहनीबजारमे रहल अमृता मनि ट्रान्सफर मार्फत बाढ पीडितहुकने नगद हस्तान्तरण करले बा । वडा नम्बर आठमे वड अध्यक्ष दुःखीराम कठरिया आइएमइसे निकारल नगद हस्तान्तरण करल रहिट । नगद हस्तान्तरण करटी उहाँ डिडब्लुआरएफके यी सहयोगसे बाढ पीडितहुकनहे भारी राहत पुग्न बटैलै । कैलारी–८ मे सबसे ढेर बाढ प्रभावित रहल ओ ओइने आर्थिक समस्याके कारण भत्कल घर मर्मतफे करे नइसेकल बटैलै ।

पाइल सहयोगसे भित्ता मार्फत कैनासे लेके जेकर घर खाद्यन्न नइहो उहीसे किने सेक्ना अध्यक्ष दुःखीराम कहलै । यी बरस वडा नम्बर आठमे बाढके जोखिम रहल ठाउँमे तटबन्ध ओ डयामके लाग १२ लाख काम करल उहाँ बटैलै । बाढ पीडित विक्रम चौधरी यी बरसके बाढसे घारी पुरे ढलल ओ घरेम भित्ता गिरल बटैलै । नगद हस्तान्तरण कार्यक्रममे डिडब्लुआरएफके सहजकर्ता दिलेन्द्र चौधरी ओ सविता चौधरीफे रहल रहिट ।