सुदूरपश्चिममे ४६ मे संक्रमित ठप्लै

पहुरा समाचारदाता
धनगढी,८ कुवाँर । सुदूरपश्चिम प्रदेशके विफेक रोज टमान जिल्ला ४६ जाने संक्रमित ठपल बाटै । सेती प्रादेशिक अस्पतालके प्रयोगशालामे करल परिक्षणमे कैलालीके २४ जाने, डोटी अस्पतालके प्रयोगशालामे ४ जाने, डडेल्धुरा अस्पतालके प्रयोगशालामे ११ जाने ओ बझाङ अस्पतालके प्रयोगशालामे ७ करके ४६ जनहनमे कोरोना संक्रमण पुुष्टि हुइल हो । जेम्ने कैलालीके २४, डडेल्धुराके एक, डोटीके ४, बझाङके ७, बैतडीके १० करके ४६ जनहनमे कोरोना संक्रमण पुष्टि हुइल सामाजिक विकास मन्त्रालय जनैलै बा ।

ओस्टेक सेती प्रादेशिक अस्पतालके सूचना अधिकारी दिलिपकुमार श्रेष्ठके अनुसार धनगढी–११ मे चार महिला, ६ पुरुष करके १० जे, धनगढी–२ ओ लम्कीचुहामे ४/४ जे, धनगढी–१२ मे ३ जे, जानकी कैलालीमे २ ओ गोदवरी–१ मे एक करके २४ जाने कोरोना संक्रमित ठपल बाटै । जेम्ने ८ महिला, १६ पुरुष रहल बाटै ।

पछिल्का २४ घण्टामे ३ सय ४९ जनहनमे करल परिक्षणमे २४ जनहनमे पोजेटिभ डेखल सूचना अधिकारी श्रेष्ठ जनैलै । सेती प्रादेशिक अस्पतालमे अभिनसम ४२ हजार ४ सय ५३ जनहनके पीसिआर जाँच करलमे ३९ हजार ८ सय १० के निगेटिभ ओ २६ सय ४२ के पोजेटिभ रिपोर्ट आइल उहाँ जनैलै । ओस्टेक करके सेती प्रादेशिक अस्पतालके कोभिड आइसोलेशन वार्डमे सुदूरपश्चिमके टमान स्थानीय तहके १५ जाने उपचार करैटी रहल बाटै ।

ओस्टेक करके पछिल्का २४ घण्टामे नेपाल भर १४ सय ९७ जनहनमे कोरोना भाइरसके संक्रमण पुष्टि हुइल बा ।

स्वास्थ्य तथा जनसंख्या मन्त्रालयके अनुसार ११ हजार ४४९ जानेक पीसीआर परीक्षण करेबेर १४९७ जनहनमे कोरोना संक्रमण हुइल हो । नेपालमे कोरोना संक्रमितके कुल संख्या ६९ हजार ३०१ पुगल बा ।

पछिल्का २४ घण्टामे कोरोना भाइरस संक्रमणमुक्त हुके ४५७ जाने डिस्चार्ज हुइल बाटै । बिफेसम ५० हजार ४११ जाने कोरोनामुक्त हुइल बाटै । कोरोना भाइरस संक्रमणके कारण हालसम नेपालमे ४ सय ५३ जानेक ज्यान गैल मन्त्रालय नियमित प्रेस ब्रिफिङमे जानकारी डेले बा ।

कहाँ कटरा संक्रमित ठप्लै

पछिल्का २४ घण्टामे काठमाडौं जिल्लामे ६०९, चितवनमे १३७, ललितपुरमे ९५, रुपन्देहीमे ८६, मोरङमे ७३, बाँकेमे ५३, भक्तपुरमे ५१ जाने, कैलालीमे ४५ जाने कोरोना संक्रमण विल्गाल बा ।

ओस्टेक बर्दियामे २४, पर्सा, सिराहामे २३, मकवानपुरमे २१, तनहुँमे १७, सप्तरीमे १६, नवलपरासी पूर्व ओ नवलपरासीमे १४/१४, सुनसरीमे १३, ओखलढुंगा, काभ्रेपलाञ्चोक, बाग्लुङमे १२/१२, धनुषा ओ बैतडीमे १०/१०, गोरखा ओ दाङमे ९/९ जानेमे कोरोना संक्रमण पुष्टि हुइल बा ।

नुवाकोट, कास्की आ स्याङ्जामे ८/८, बारा, पर्वत ओ प्युठानमे ६/६, सिन्धुलीमे ५, झापा, महोत्तरी, रौतहट, धादिङ, गुल्मी, पाल्पा, सल्यान, कञ्चनपुर ओ डोटीमे ४/४, संखुवासभा, दोलखा, अर्घाखाँची ओ सुर्खेतमे ३/३ जाने, उदयपुर, लमजुङ, कपिलवस्तु, दैलेखमा २/२, भोजपुर, सर्लाही, रामेछाप, अछाम, डडेल्धुरा ओ दार्चुलामे १/१ जनहनमे कोरोना भाइरस संक्रमण पुष्टि हुइल मन्त्रालय जानकारी डेहल बा ।