कोरोनासे मृत्यु हुइल महिलाके शव व्यवस्थापन

पहुरा समाचारदाता
धनगढी, १३ कुवाँर । सेती प्रादेशिक अस्पतालमे मृत्यु हुइल उपचाररत कोरोना संक्रमित महिलाके शव मंगरके रोज व्यवस्थापन करल बा ।

ओहकान शव नेपाली सेनासे धनगढी उपमहानगरपालिका वडा नं.७ देहरिया सामुदायिक वनके पथरीमे व्यवस्थापन करल बा । भवानी दल गणके सह सेनानी नवल सिंह रोकायाके कमाण्डमे खटल टोली शव व्यस्थापन करल हो ।

धनगढी उपमहानगरपालिका १ के ६३ वर्षिया महिलाके कोरोनासे सोम्मारके मृत्यु हुइल रहे । उहाँ कुवाँर ७ गते अस्पताल भर्ना हुइल रही ।

१० गते उहाँमे कोरोना संक्रमण पुष्टि हुइल ओ सोम्मारके मृत्यु हुइल अस्पताल जनैले बा । जटील अवस्थामे रहल ओहकानमे दमखोकी लगायत फोक्सोमे समस्या रहल रहे ।