‘ सशक्त महिला समृद्ध नेपाल परियोजनाके समीक्षा ’
महिला आघे बह्रना अपनसे सुरुवाट कैनामे जोड
पहुरा |
४ मंसिर २०८३, शुक्रबार
पहुरा समाचरदाता
धनगढी, ४ अगहन । महिला पुनस्र्थापना केन्द्र (ओरेक)से संचालन करल शसक्त महिला समृद्ध नेपाल परियोजनाके सरोकारवाला निकायसे शुकके रोज धनगढीमे समिक्षा तथा सिकाई अदानप्रदान कार्यक्रम सम्पन्न हुइल बा ।
जिल्ला समन्वय समिति कैलालीके प्रमुख टीकाकुमारी चौधरी भुलके प्रमुख आतिथ्यतामे हुइल कार्यक्रममे उहाँ विभेद ओ हिंसा अभिन अन्त्य हुई नैसेकल कहटी ओकर अन्त्यके लाग सुरुवाट आपनथेनसे सुरुवाट करेबेर पर्ना बटैली ।
पहिलेक तुलनामे महिलाहुक्रे अब्बे नेतृत्व तहमे पुगल मने निर्णयक तहमे पुग्ना बाँकी रहल कहटी महिलाहुक्रे आघे बह्रेक लाग अपनही सक्षम हुइना जरुरी रहल उहाँ बटैली ।
पितृसतात्मक सोच रहटसम महिलाहुक्रे आघे बह्रे नैसेक्ना कहटी महिलाहे आघे बह्राइक लाग सक्कु जानेक सहयोग रहेपर्ना मने महिला झन जागरुक हुइना बटैली । उहाँ परियोजनासे महिलाहुकनहे आघे बह्रना हौसला प्रदान करल कहटी सदैव सहकार्य रना प्रतिवद्धता जनैली ।
सिलगढी नगरपालिकाके नगर उपप्रमुख कलावती महर साउँद महिलाहुकनहे आघे बह्रेक लाग ढेर अइना करल मने उहीहे पन्छाके आघे बह्रेपर्ना बटैली ।
कौनाफे महिलाहे आघे बह्रेक महीसे सुरुवाट करेपरठ कना शब्द विस्राई नैहुइना बटैली । अब्बे निर्वाचित महिलाहुकनके सख्या केल्ह पुगल मने निर्णय कैना ठाउँमे पुगे नैसेकल बटैली ।

महिला अभियन्ता कमला चौधरी लैङिक उत्तरदायी बजेट सक्कु जानेक साझा हो कहिके बुझके जाई पर्ना बटैली । परियोजनासंग दुई बरस जोरल कहटी यकर अभियानसे अपनेलगायत ढेर महिलाहुकनहे आघे बह्रना हौसाला प्रदान करल बटैली । परियोजनाके अभियानसे लैङिक उत्तरदायी बजेट निर्माण, नेतृत्व विकास, क्षमता अभिवृद्धि, योजना निर्माण प्रक्रियामे सक्कु क्षेत्रके समावेशी, आघे बह्रेबेर प्रमाण ओ सत्यतथ्यके खोजी लगायत ढेर बाट सिखल जानकारी डेली ।
लुमटीके प्रतिनिधि हर्कबहादुर ओली गैसस नेपाल सरकारसे प्रतिष्प्रर्धा करे नैआइल बल्की सहयोगीके भुमिका निर्वाह करे आइल बटैलै । गैसस सिमित समयके अभियान संचालन करल मने मजा पक्षसे सक्कु जाने अङिगकार करके जाई पर्ना बटैलै ।
स्थानीय तहके दुसरा कार्यकाल ओरेना अन्तिम समय लागे लागल कहटी मजा कामहे दस्तावेजीकरण कैना ओ अइना जनप्रतिनिधि बुझाई पर्ना बटैलै ।
कार्यक्रममे खप्तडछान्न गाउँपालिकाके लक्ष्मी रावल, दुर्गाथली गाउँपालिकाके देवकी विष्टलगायत मन्तव्य राखल रहिट । कार्यक्रममे ओरेक कार्यकारी निर्देशक रेखा श्रेष्ठ यी परियोजना सुदूरपश्चिम, कर्णाली ओ मधेश प्रदेशके ३९ स्थानीय तहमे दुई बरस अभियान संचालन करल जानकारी डेली । अभियान संचालन मै ठेनसे सुरुवाट करटी समाज, वडा, पालिका तथा नेतृत्वकर्तासम पुगल बटैली ।
परियोजनाके समिक्षा संगे ओकर गतिविधिहे समेटके बनाइल भिडियो डकुमेन्ट्रीमे महिलाहुक्रे टमान मेरिक अधिकार पाइल, बोले ओ नेतृत्व सेक्ना अवस्थामे, लैङिक उत्तरदायी बजेटके खोजीेमे अग्रसर हुइल डेखा परल रहिट ।
कार्यक्रमबारे जानकारी डेटी ओरेकके सचिव संगिता अधिककारी यी संस्था महिलाउप्पर हुइना हिंसा न्यूनिकारण करेक लाग विगत २४ बरससे अभियान संचालन करल जनैली । कार्यक्रमके संचालन ओ सहजीकरण ओरेक कैलालीके जिल्ला संयोजक गिता चौधरी करल रही । कार्यक्रम कृष्णा चौधरीके अध्यक्षतामे समापन हुइल रहे ।

