आरोपित सात जाने सार्वजनिक, सीमामे ठप गस्ती बह्रागैल

पहुरा समाचामरदाता
धनगढी, ४ कार्तिक । अस्थायी प्रहरी पोष्ट जुगेडामे कार्यरत प्रहरी सहायक निरिक्षक गोविन्द विक ओ प्रहरी जवान रामबहादुर साउँदके हत्यामे संलग्न सात जाने पक्राउ परल बाटै । हत्या आरोपमे पक्राउ परलहुकन जिल्ला प्रहरी कार्यालय कैलाली मंगरके रोज पत्रकार सम्मेलनके आयोजना करके सार्वजनिक करले बा ।

पक्राउ परलमे कैलाली धनगढी उपमहानगरपालिका वडा नम्बर १० बैठना वर्ष ३१ के पर्कु कना रोहित राना, वर्ष २० के राजेन्द्र राना, वर्ष ३० के चोर कना सुरेश राना, वर्ष २५ के गब्बर कना राजकुमार राना, वर्ष २२ के रामनिवास राना, वर्ष २९ के टल्लु कना दलराम राना ओ धनगढी उपमहानगरपालिका वडा नम्बर ११ बैठना वर्ष २५ के गोपाल कना रामगोपाल राना रहल जिल्ला प्रहरी कार्यालय कैलालीके प्रवक्ता तथा प्रहरी नायव उपरीक्षक प्रतिक विष्ट जनैलै ।

यिहे कार्तिक १ गते रातके १०ः३० बजेके समयमे अस्थायी प्रहरी पोष्ट जुगेडामे कार्यरत प्रहरी सहायक निरिक्षक विक ओ प्रहरी जवान साउँद सीमावर्ती क्षेत्रमे हुइना अपराध एवं तस्करी नियन्त्रण प्रयोजनार्थ जुगेडाके दक्षिणी भागमे नियमित गस्ती जैना क्रममे तस्कार घरेलु हतियार प्रहार करके हत्या करल प्रवक्ता विष्ट जानकारी डेलै ।

धनगढी उपमहानगरपालिका–१० स्थित मोहना लडियामे अन्दाजी ४०० मिटर उत्तरमे सीमामे अवैध समानहुकनके तस्करी करटी तस्करहुकनके समूहहे रोक्न एवं नियन्त्रणमे लेना क्रममे तस्करके समूहसे योजनावद्ध रुपमे धरियार हतियार प्रहार करके दुनु जानेक हत्या करल पत्रकार सम्मेलनमे उहाँ जनैलै ।

हत्या करके घिस्यटी करिब ४ सय मिटर दक्षिणमे नेपाल–भारत सीमामे रहल मोहना लडियामे लैजाके अपराध नुकैना उद्देश्यसे फेक्कके फरार हुइलमे ओकर सकारे कार्तिक २ गते प्रहरी सहायक निरिक्षक गोविन्द(बाँकी २ पेजमे) ओ प्रहरी जवान रामबहादुरके खोजी करल रहे ।

पत्रकार सम्मेलनमे प्रवक्ता विष्ट कहलै, ‘मृतक प्रहरी सहायक निरिक्षक गोविन्द के लाश कार्तिक २ गते मोहना लडियामे सकारे ९ बजे ओ प्रहरी जवान रामबहादुरके लाश मंगरके सकारे १०ः२५ बजे ओर उहे मोहना लडियामे फेला पारल हुई ।’

घटना पश्चात सुदूरपश्चिम प्रहरी कार्यालय ओ जिल्ला प्रहरी कार्यालयके संयुक्त टोली घटनाके अनुसन्धान करटी जाईबेर घटनामे संलग्न उ सात जानेक पहिचान हुके पक्राउ करल उहाँ जनैलै । सात जानेक विरुद्ध ज्यान मारा सम्बन्धी कसुरमे मुद्दा दर्ता हुके आवश्यक अनुसन्धान हुइटी रहल प्रवक्ता विष्ट जनैलै ।

घटनामे संलग्न और व्यक्ति रहल÷नइरहल घटना का कैसिक घटाइल कना सम्बन्धमे साथे आवश्यक और विषयमे अनुसन्धान कार्य हुइटी रहल ओ अनुसन्धानके क्रममे ठप बाट बाहेर आइसेक्ना उहाँ जनैलै ।

सीमामे ठप सुरक्षा चुनौती महसुस करटी गस्ती बह्राइल जिल्ला प्रहरी कार्यालय जनैले बा । प्रवक्ता विष्ट कहलै, ‘अब्बे १५ जानेक टोली खटागिल बा, पहिले असईहे खटागिल रहे कलेसे अब्बे सईहे खटागिल बा ।’ जिप्रकासे लग्गे परना ओरसे ठप गस्ती बह्राइल उहाँ कहलैं । तस्करहुक्रे यिपारसे उपार केराउ लैजिटिरहल बेला उ घटना घरल रहे ।

मुख्यमन्त्री घट्नाके जानकारी लेलैं

सुदूरपश्चिम प्रदेशके मुख्यमन्त्री त्रिलोचन भट्ट धनगढी उपमहानगरपालिका–१२ जुगेडा स्थित अस्थायी प्रहरी चौकीके ईञ्चार्ज असई गोविन्द बिक ओ प्रहरी जवान राम बहादुर साउँदके हत्याके घट्ना बारे सुदूर पश्चिम प्रदेश प्रहरी प्रमुख प्रहरी नायव महानिरिक्षक उत्तम सुवेदीसे जानकारी लेले बाटै ।

शनिच्चरके रात धनगढी उपमहानगरपालिका–१०, जुगेडा गस्तीमे गैल बेला असई बिक ओ जवान साउँदके तस्करहुक्रे निर्ममता पूर्वक हत्या करल रहिट । उ घट्नामे चासो व्यक्त करटी मुख्यमन्त्री भट्ट प्रहरीसे प्राप्त करल उपलब्धी ओ घट्नाके बारेमे डिआईजी सुवेदीसे बिस्तृत जानकारी लेहल रहिट । डिआईजी सुवेदीसे जुगेडा घट्नामे प्रहरीसे जारी राखल कारबाही, अनुसन्धान ओ हालसम प्राप्त उपलब्धीके बारेम मुख्यमन्त्री भट्टहे जानकारी डेहल रहिट ।

सम्बन्धित समाचार

वेपत्ता प्रहरी जवान साउँद शव मिलल

तस्करसे हुइल भीडन्तमे असईके मृत्यु, प्रहरी जवान बेपत्ता