थारु म्युजिक भिडियो ‘चोरी चोरी नैना लरल…’ छायांकन

पहुरा समाचारदाता
धनगढी, १५ कुवाँर । डश्या डेवारी लच्क्ययटी रहल बेला थारु गीत संगीत तथा म्युजिक भिडियो धमाधम बजारमे अइटी रहल बा ।

लावा लावा गीत संगीत निर्माण हुइटी ओकर म्युजिक भिडियो फेन बन्टी रहल बा । यकर संगे बजार ओर फेन अँट्वार पिच्छे दुइ तीनठो म्युजिक भिडियो सार्वजनिक हुइटी रहल बा ।

यिहे संगे थारु म्युजिक भिडियो ‘चोरी चोरी नैना लरल…’ के छायांकन कार्य ओराइल बा । कैलारी गाउँपालिका वडा नं. ३ उत्तरभर्री स्थित सुन्दर एवं पर्यटकीय पुरैना टल्वा परिसरमे छायांकन हुइल हो । गायक गणेश चौधरी ओ समीक्षा चौधरीके स्वर रहल गीतमे बन्टी रहल भिडियोमे मोडल जगत गुरु ओ सपना राना रहल बाटै ।

भिडियोके डाइरेक्सन चन्द्र चौधरी चाँद ओ मुन्ना लभकुश्मीके रहल बा । म्युजिक भिडियो डश्या डेवारीके अवसर पारके सार्वजनिक हुइना निर्माण पक्ष जनैले बा ।