विद्यार्थीनके बाहिरी ज्ञानमे एभरेष्टके सिखाइ
कोरोनाके कारन लकडाउन हुइल कारन लम्मा समयसम स्कुल, कलेज बन्द रहल । डोसर शैक्षिक सत्र अइटि रहलबेला बल्ले स्कुल सुचारु हुइल बा । मने ढेर दिन पह्राइ छुटल कारन पोस्टा हेरक मन नैलग्ना विद्यार्थीन पह्राइमे कसिक आकर्षित कर्ना मस्टरवन लग चुनौतीक विषय हो ।
इहे बिच कैलालीके गोदावरी नगरपालिका, अत्तरियामे रहल एभरेष्ट एकेडेमी विद्यार्थीनहे समुदायस्तरके टमान विषयबस्तुके अध्ययन अनुसन्धानके अभ्यास करैटी रहल समाचार आइल बा । विद्यार्थीन किताबी ज्ञानमे किल सीमित नाइ राखके ओइन बाहिरी ज्ञानमे पोख्त बनैना उद्देश्यसे समुदायमे पुगके अध्ययन अनुसन्धानके करैटी रहल स्कुल व्यवस्थापन जनैले बा । समुदायके वास्तविकतासंग विद्यार्थीनहे परिचित करैना उद्देश्यसे फेन समुदायके अध्ययन, अनुसन्धान अभ्यास करैटि रहल जनागइल बा । कोरोना कम हुइल पाछे किल नाहि, स्कुलसे पहिलेसे जो विद्यार्थीनहे बाहिरी ज्ञानमे सक्षम बनाइक लाग टमान मेरिक प्रयोगात्मक सिकाइ कार्यक्रम चलैटी आइल फेन जना गइल बा ।
विद्यार्थी किताबी ज्ञानमे किल सीमित नै हुइक चाहि । पोस्टा टे एकठो माध्यम किल हो । एभरेष्ट एकेडेमीके कक्षा ९ ओ १० के विद्यार्थी कञ्चनपुरके कृष्णपुर नगरपालिकास्थित बाणी मुक्त कमैया शिविर ओ विजयसाल होमस्टे पुगके टमान सामाजिक मुद्दामे अध्ययन अनुसन्धान कर्ले रहिट । मुक्त कमैयनके समस्या समाधान नैहुइल बाट समाचारमे किल पह्रटि आइल विद्यार्थी प्रत्यक्ष सोधपुछ कैके ओइनके पहिलेक ओ अब्बेक अवस्थाके तुलनात्मक अध्ययन करे पैना, मुक्त कमैयाके लावा पेशाबारे जाने पैना, गाउँ चलैना बरघर भलमन्सा प्रथाबारे जाने पैना बरवार सिखाइ हो । गाउँक साढारन व्यक्ति फेन सिखाइके लग मजा स्रोत व्यक्ति बने सेक्ठाँ कना इ मजा उदाहरन हो ।
विद्यार्थी अपन लगुच्चेक गाउँ ठाउँके अध्ययन भ्रमन कैके का निष्कर्ष निकरलाँ ? स्कुल व्यवस्थापन अध्ययनके निष्कर्षसहित प्रतिवेदन तयार पारके कृष्णपुर नगरपालिकाहे बुझैना फेन जना गइल बा । अध्ययनके इ सबसे सबल पक्ष हो । इहिसे स्थानीय सरकारहे नीति ओ कार्यक्रम बनैनामे फेन सहयोग पुगी ।
एभरेष्ट एकेडेमी अपन विद्यार्थीन जसिक सिर्जनशील बनैना अभियानमे लागल बा । औरे स्कुलके व्यवस्थापनके लग फेन इ उदाहरनीय बा । विद्यार्थीन बाहिरी ज्ञान स्कुल भित्तर करियाके डेहे नै सेक्जाइठ । सुग्गा हस पोस्टा किल रट्नासे अपन गाउँ ठाउँक समस्यक बारेम जानकार विद्यार्थी फेन रना चाहि ।
