कन्द्रा लडियक् पुल, कहाँ हुइल भुल ?
कैलालीके भजनी नगरपालिका–३ स्थित कन्द्रा लडियामे पुल बने सुरु हुइल नौ बरस बिट सेकल । मने इ नौ बरसमे पुलके ६० प्रतिशत किल काम हुइल जानकारी मिलल बा । जबकि पुल साढे दुई बरस भिट्टरमे निम्जैना कहिके बिरुवा लामासाल्पा शेर्पा कम्पनी ठेक्का लेले रहे । आब सवाल उठल बा, कन्द्रा लडियक् पुल बनैनामे कहाँ हुइल भुल ?
हुलाकी राजमार्गअन्तर्गत २०६८ से पुल बनक सुरु हुइल रहे । मने खेच्हिक चालमे बन्टि रहल पुलले हाँठि छिरल, पुँछि अँटकल हस हुइल बा । काजेकि उ पुल बाहेक आउर ठाउँमे खासे अबरोध नै हो ।
पुल नाइ हुइल कारन उ क्षेत्रके जनतन लाउले लडिया नघ्ना बाध्यता बटिन । लर्कापर्कन बर्खाबुँडिमे स्कुल अइना जैनासे लेके बेरम्यन अस्पताल पुगैना समस्या बटिन । ओस्टक लम्मा समयसम पुल नइ बनके हुलाकी राजमार्ग संचालन हुइ नै सेक्ठो । इ आर्थिक बरस भिट्टर जसिक फेन पुल बनाके निम्जैना निर्माण कम्पनीके साइड प्रतिनिधि जनैले बटै । मने विश्वास कैना कौनो आधार नै हो ।
अपन गाउँ ठाउँके निर्माणके काममे स्थानीय निकायके फेन चासो रना चाहि । ओहेसे सम्बन्धित जनप्रतिनिधिन कन्द्रा लडियाके पुल जसिक फेन इहे बरस निम्जैनामे सहजिकरन करिट । स्थानीयवासी फेन चासो राखिट ।
ओइसिन टे बन्टि रलक पुल बर्सौसम अच्कच्रे रना लावा बाट नैहो । लावा बनल पुलमे समस्या अइटि रलक डोसर समाचार फेन बा । उडाहरनके लग कैलारी गाउँपालिका–५, कटैनीपुलमे खट्हा परके दुर्घटनाके सम्भावना बर्हल बा । उ पुलके मर्मतके लाग समयमे जो सम्बन्धित निकायके ध्यान जाए । बाम भगाके पुस्टा सँवारे हस दुर्घटनाके बाद किल सम्बन्धित निकायके ध्यान जैना ठिक काम नाइ हो ।
सम्बन्धित समाचार
