सहकारीहे कृषि ओ उत्पादन क्षेत्रमे लगानी कैना आग्रह

पहुरा समाचारदाता
धनगढी, २९ पुस । राष्ट्रिय सहकारी महासंघके पुर्व सञ्चालक तथा जिल्ला सहकारी संघ लिमिटेडके सल्लाहकार समिति संयोजक भोजबहादुर बम सहकारी संस्थाहे कृषि ओ उत्पादनमे लगानी कैना आग्रह करले बटै ।

मंगरके रोज धनगढीस्थित शिलादेवी कृषि सहकारी संस्थाके छैठौं वार्षिक साधारण सभाके उदघाटनसत्रमे बम उ बाट बटाइल हुइट । नेपाल कृषि प्रधान देश हुइलेसेफे यहाँ हरेक खाद्यन्न वस्तु आयात हुइना ओरसे अइना दिनमे सहकारी संस्था कृषि ओ उत्पादन क्षेत्रमे लगानी करे पर्ना बटैलै ।

सहकारी संस्थासे बचत कैना नाही, उहाँ कहलै, ‘सहकारी संस्थासे विश्वके अर्थतन्त्रमे मजा फड्को मरले बा । हमार देश कृषि प्रधान हुइल ओरसे पुँजीहे उत्पादनसंग जोरके कृषिमे लगानी करे परठ । उहाँ सामाजिक, सांस्कृतिक रुपान्तरणके लाग शिलादेवी कृषि सहकारी संस्थासे प्रसंसनीय कार्य करल बटैलै ।

शिलादेवी कृषि सहकारी संस्था लिमिटेडके अध्यक्ष बालकृष्ण श्रेष्ठके अध्यक्षतामे हुइल कार्यक्रममे उहाँ वार्षिक प्रतिबेदन प्रस्तुत करल रहिट । लेखा समितिके संयोजक कलावती जोशी आव २०७६÷७७ असारमसान्तसमके आन्तरिक प्रतिवेदन प्रस्तुत करल रहिट ।

२०७१ सालमे २५ जाने शेयर सदस्यसे सुरु हुइल सहकारीसे १८० जाने शेयर सदस्य बनैना सफल हुइल बा । सहकारी संस्थाके आव २०७७ पौष २७ गतेसम ४० लाख ५२ हजार ५ सय रुप्या, निक्षेप १ करोड ३३ लाख २३ हजार ४१ रुप्या रहल बा ।

सहकारी संस्थासे अपन कार्य क्षेत्र धनगढी उपमहानगरपालिकाका ५ वडामे विस्तार करल बा । कार्यक्रममे स्वागत मन्तव्य उपाध्यक्ष दिलिप श्रेष्ठ ओ संस्थाके सदस्य निर्जन श्रेष्ठ कार्यक्रमके सञ्चालन करल रहिट ।