‘वेरोजगारीके समस्या सक्कुजे मिलके समाधान करी’

पहुरा समाचारदाता
धनगढी, ११ फागुन । वेरोजगारीके समस्या सक्कु जे मिलके समाधान कैना धनगढी उपमहानगरपालिकाके नगर प्रमुख नृप बहादुर वड बटैले बटै ।

निडस नेपालके आयोजनामे सोम्मारके रोज धनगढीमे हुइल ‘स्थानीय प्लानिंग प्रक्रियामे एकीकरण बजार उन्मुख टिभीइटीके लाग स्थानीय सरकारसंग स्थानीय संवाद’ कार्यक्रममे बोल्टी उहाँ उ बाट बटवाइल रहिट । उहाँ कहलै, हम्रे करे पर्ना काम कर्तव्यबारे पत्ता नइपैना, वेरोजगार रहल केल डेखना कहाँसे हुई, यकर समाधानके लाग सक्कु जे लागे परल ।’

‘जापानमे ८ कक्षा पास करलपाछे मनै रोजगार हुइठै, ८० बरसके बुढाइल मनैफे रोजगार रहठै,’ उहाँ कहलै, ‘उ देशमे ट्रेन बैठल बा नीति बनल बा, मने हमार देशमे पीएच, मास्टर करल यूवा सडकमे बटै, तालिम डेहे सडकमे छोरडेना काम हुइठ, उहे कारण समस्या परल बा ।’

भुटला कटना, चाट बनैना मनै हमार ठेन नइ हुइट, कलेसे कहाँसे रोजगारी हुई, जौनफे कामहे छोट सोच्ठी, भारी लगानीके कामहे केल काम कठी कहाँसे हुई उहाँ कहलै । नगर प्रमुख वड कहलै, ‘आन्दोलन करेबेर लाखौ मनै अइना,प्रधानमन्त्री स्वरोजगारके काम करे कोई नइचाहना, अनि कहाँ वेरोजगार कहे मिली ।’ हमार ठेन जमिन बा, और साधन बा, मने व्यवस्थापन करे नइसेकल नगरप्रमुख बटैलै ।

सीटीइभीटी सुदूरपश्चिम प्रदेश निर्देशक डा. कुष्माकर भट्ट सीपमुलक तालिमसे केल रोजगारी सृजना करे सेक्ना बटैलै । उहाँ कहलै, देशभरके ४३ लाख यूवा बैदेशिक रोजगारीमे बटै, यहाँ खेतीपति, पर्यटन, मेकनिजमके सम्भावना रहल मने यूवा पलायन हुइना क्रम जारी बा ।’

निडस नेपालके कार्यकारी निर्देशक भवराज रेग्मी तालिम लेहल व्यक्ति व्यवसाय नइकरल बटैलै । कृषिहे उद्योगके रुपमे लैजैटी औद्योगिकरण करलेसे वेरोजगारीके समस्या समाधान हुइना उहाँ जनैलै ।

होटल व्यवसायी संघके अध्यक्ष कलम बम लगानीमैत्री वातावरण नइरहल बटैलै । उहाँ कहलै, नीति क्षेत्रसे लगानी करलेसे वेरोगार यूवा रोजगारी पाई सेक्ही । कैलाली उद्योग वाणिज्य संघके महासचिव ओम पन्त स्थानीय तहमे तथ्याङक आवश्यक रहल बटैलै । उहाँ कहलै, भौगोलिक अवस्था अन्सार मेनपावर उत्पादन करे नइसेकल कारण बाहेरसे मनै मगाके काम करे पर्ना अवस्था बा ।

कार्यक्रमके सहजीकरण तथा संस्थाके बारे जानकारी निडस नेपालके परियोजना कार्यक्रम संयोजक विनोद कडारा डेहल रहिट । निडस नेपाल बजारमा आधारित प्राविधिक तथा व्यावसायिक सीप प्रवद्र्धन परियोजना मार्फत कैलाली, कञ्चनपुर ओ बझाङ यूवा समुह ओ रोजगारदाताहुकनसंग काम करटी रहल बा । कार्यक्रममे सहयोग यूरोपियन यूनियन, ब्रिटिस काउन्सिलके व्यवस्थापन ओ दक्षता (टिभीइटी) अन्र्तगत हुइल रहे ।