प्याब्सन कप प्रतियोगिता सुरु
पहुरा समाचारदाता
धनगढी, ३ चैत । धनगढीमे मंगरसे मेयर, उपमेयर प्याब्सन कप छात्रछात्रा प्रतियोगिता सुरु हुइल बा ।
संघीय प्रहरी ईकाइ कार्यालय धनगढीके खेल मैदानमे सुरु हुइल प्रतियोगिताके धनगढीके नगर प्रमुख नृपबहादुर वड ओ उपप्रमुख सुशीला मिश्र एक समारोहके विच उद्घाटन करले रहिट । उद्घाटन कार्यक्रममे बोल्टी धनगढी उपमहानगरपालिकाके नगर प्रमुख वड राष्ट्रके लाग, स्वास्थ्यके लाग केल नहुके समाजके लागफे खेलकुद आवश्यक रहल बटैलै । खेलाडी अनुशासित रहठ नगरप्रमुख वड कहलै, ‘जौन समाजमे खेलाडी बाटै उ समाज अनुसाशित रहठ ।’
मेयर, उपमेयर प्याब्सन कप छात्रछात्रा प्रतियोगितासे निरन्तरता पैना नगरप्रमुख वड बटैलै । उहाँ कहलै, आव नीजिसंगे सामुदायिक विद्यालयके विद्यार्थीकेफे प्रतियोगितामे सहभागिता कराई परल ।
धनगढी उपमहानगरपालिकाके उप–प्रमुख सुशीला मिश्र भट्ट हरेक क्रियाकलापमे छात्रा ओ छात्राके सहभागिता महत्वपूर्ण हुइना बटैली । अब्बे आयोजना करल मेयर, उपमेयर प्याब्सन कप छात्रछात्रा प्रतियोगितासे समाजके धारणामे परिवर्तन नन्ना सहयोग पुगाई उप–प्रमुख भट्ट कहली, छात्रसेफे खेलमे प्रतिस्पर्धा करे सेकी कना सन्देश यिहीसे डेना बा ।’ उपप्रमुख भट्ट प्रतियोगितामे सहभागिहे धन्यवाद डेटी कार्यक्रम सफलताके शुभकामना डेली ।
क्यानके सुदूरपश्चिम प्रदेश अध्यक्ष हरी रेग्मी मेयर, उपमेयर प्याब्सन कप छात्रछात्रा प्रतियोगिताके लाग सहयोग कैना धनगढी उपमहानगरपालिका ओ आयोजना कैना धनगढी प्वाब्सनहे धन्यवाद डेलै । डगर घाट निर्माणहे केल विकास नइमानजाई अध्यक्ष रेग्मी कहलै, ‘धनगढी उपमहानगरपालिकासे पूर्वाधारके साथे खेलकुल, सामाजिक क्षेत्रमेफे मजा काम करले बा ।’
सुदूरपश्चिम विश्व विद्यालयके पूर्व रजिष्टार डा. हेमराज पन्त धनगढी खेलकुदके क्षेत्रमे अलगे पहिचान बनाई सेकल बटैलै । कार्यक्रममे सुदूरपश्चिम विश्व विद्यालयके पूर्व रजिष्टार डा पन्त, पूर्व शिक्षा निर्देशक नन्दराज जन्त लगायतहे सम्मान करल रहे । प्रतियोगिता चैत १२ गते सम चली ।
