धनगढी हाफ म्याराथुनके उपाधि दुर्गा बुढाहे
पहुरा समाचारदाता
धनगढी, २८ चैत । आब धनगढी दौरी कना मुल नाराके साथ धनगढी जेसिसे आयोजना करल सातौं संस्करणके धनगढी हाफ म्याराथुनके उपाधी जुम्लाके दुर्गा बहादुर बुढा जित्ले बाटै ।
२१ दशमलक १ किलोमीटरके दुरि उहाँ १ घण्टा ०६ मिनेट ०८ दशमलव १८ सेकेन्डमे पार कैटी उपाधी जितल हुइट । बुढाके इ लगातार तेस्रो उपाधी हो । उपाधी संगे बुढा नगद ५५ हजार ५ सय ५५ रुपैया समेत प्राप्त करले बाटै ।
ओस्टके निर्धारित दुरि १ घन्टा ०९ मिनेट ०८ दशमलव ५३ सेकेण्डमे पार कैटी बैतडीके नरेन्द्र रावत डुसरा हुइलै कलेसे सशस्त्र प्रहरीके सन्तोष बिष्ट टिसरा हुइलै । उहाँ २१ दशमलव १ किलोमीटरके दुरि १ घन्टा १२ मिनेट ०४ दशमलव २७ सेकेण्डमे पार करलै । डुसरा ओ टिसरा स्थान प्राप्त करुइया रावत ओ बिष्ट नगद ३३ हजार ३ सय ३३ ओ २२ हजार २ सय २२ रुपैया समेत प्राप्त करले बाटै ।
ओस्टके पहिलचो आयोजना करले खुला ५ किलोमीटर महिला ओरके उपाधी कैलालीके सीमा चौधरी प्राप्त करले बाटी । उहाँ उक्त दुरि २० मिनेट दशमलव ११ सेकेण्डमे पूरा करल रही । उपाधी संगे चौधरी नगद ५ हजार ५ सय ५५ रुपैया प्राप्त करले बाटी ।
ओस्टके सीता चौधरी डुसरा ओ नेहा खड्का टिसरा हुइल बाटै । चौधरी निर्धारित दुरि २० मिनेट ४४ दशमलव २८ सेकेण्ड ओ खड्का २२ मिनेट ६ दशमलव ३१ सेकेण्डमे पूरा करल रहिट ।
उपाधी संगे डुसरा ओ टिसरा हुउइया क्रमशः ३ हजार ३ सय ३३ रुपैया ओ २ हजार २ सय २२ रुपैया नगद प्राप्त करल रहिट ।
धनगढी जेसिजके अध्यक्ष कमलराज पनेरुके घरगोसियाइमे हुइल उक्त कार्यक्रमके बिजेता खेलाडीहुक्रनहे सुदुरपश्चिम प्रदेशके सामाजिक बिकास मन्त्री कृष्णराज सुवेदी, धनगढी उपमहानगरपालिकाके उप–प्रमुख सुशीला मिश्र भट्ट लगायत पुरस्कार तथा प्रमाणपत्र प्रदान करल रहिट ।
