गोचाली परिवार मनाइल स्वर्ण जयन्ती
पहुरा समाचारदाता
बर्दिया, ५ वैशाख । गोचाली परिवार अपन स्ठापनाके स्वर्ण जयन्ती मनैले बा । २०२८ सालमे गोचाली परिवार थारु भासक् पहिला पत्रिका गोचाली प्रकासन कर्ले रहे ।
बर्दियाके बार बर्दिया नगरपालिकामे वैशाख १ गटे मना गइल स्वर्ण जयन्तीके अवसरमे महत्वपूर्ण निर्णय समेत हुइल गोचाली परिवारके अध्यक्ष दशरथ चौधरी (सुदिन) जनैलैं ।
उहाँके अनुसार, गोचाली परिवार प्रगतिशील समाज निर्माण करक लाग सुरु करल अभियानहे बैचारिक पुनर्जागरण करके रणनैतिक ढंगसे आघे बर्हैना निर्णय हुइल बा । ओहेमारे, गोचाली परिवारहे सांगठनिक रुपमे विस्तार करके पालिका ओ जिल्ला हुइटि राष्ट्रिय रुपमे विस्तार कैना हुइल बा ।
थारु समाजमे रहल कुरिति ओ कुसंस्कार आउर गोचाली परिवार योजनाबद्ध रुपमे अभियान सञ्चालन करना निर्नय हुइल बटैटि उहाँ गोचालीहे खुल्ला दायरामे लैजिना ओ थारु भाषा, साहित्यके मुलखम्भा गोचाली पत्रिकाहे थारु भासाके मानकता ओ मानक लेखनके लाग अगुवाइ कर्ना संस्थाके रुपमे विकास कर्ना कहिगैल बा ।
गोचाली परिवारके सदस्य निराजन चौधरीके अन्सार थारु लोकसाहित्यके अध्ययन, अनुसन्धान, प्रकाशनमे फेन महत्वके साथ काम कैजैने बा । उहाँ गोचाली परिवारमे आबद्ध होके गोचाली अभियानहे सशक्त ओ बल्गर बनैना क्रममे बलिदान ओ योगदान डेहल योद्धाहे परिचय पत्रसहित गोचाली ग्रन्थ प्रकाशन करना निर्णय हुइल फेन जनैलाँ । ओस्टक थारु भासा साहित्य ओ संस्कृति क्षेत्रमे कलम चलैना स्रस्टन प्रोत्साहित करक लाग गोचाली साहित्य पुरस्कार घोषणा समेत कर्ना जानकारी उहाँ डेले बटैं ।
परटेक बरस बैशाख १ गटे गोचाली परिवार गोचाली दिवस मनाइठ, मने गोचाली पत्रिका भर नियमिट नैहो ।
