युनिक नेपालसे व्यवसायिक बंगुरपालन तालिम
पहुरा समाचारदाता
बर्दिया, ३ बैशाख । बर्दियाके राजापुर नगरपालिकामे दुई दिने व्यवसायिक बंगुरपालन सम्बन्धि तालिम सम्पन्न हुइल बा ।
युनिक नेपाल लघुवित्त वित्तीय संस्था लिमिटेड शाखा कार्यालय राजापुरसे दुई दिने व्यवसायिक बंगुर पालन तालिम संचालन करल हो । युनिक नेपाल लघुवित्त वित्तीय संस्था राजापुर शाखासे संचालन करल उक्त तालिममे समुह सदस्य ३९ जनहनके सहभागीता रहल रहे । तालिमके एक कार्यक्रमके बीच राजापुर नगरपालिकाके उपप्रमुख मनकला कुमारी चौधरी तालिमके उद्धघाटन करल रही ।
कार्यक्रममे बोल्टी नगर उप प्रमुख चौधरी युनिकसे सामजिक कार्य कैटी आइल ओ महिला शसत्तीकरणके क्षेत्रमे फेन योगदान डेहल ओरसे बित्तीय कारोबारसँग सामाजिक उत्तरदायित्व कार्यमे निरन्तरता डेहलमे धन्यवाद समेत डेहल रही ।
उहाँ आर्थिक रुपमे कमजोर हुइबर कैसिन खालके समस्या आइठ् सक्कु जाने भोगल ओ डेखल ओरसे महिला डिडी बहिनीयाहे आर्थिक रुपमे बलगर हुइ पर्नामे जोड डेली । उहाँ अपने बिगतसे सामाजिक कार्यमे सक्रिय हुइल कारण क्षमता अभिवृद्धी कैटी जाइबर आज पार्टीसे मुल्याङ्कन कैटी उप प्रमुख पदमे पुगाइल समेत बटैली ।
उहाँ तालिमसे परम्परागत रुपमे कैटी आइल बंगुर पालनहे परिस्कृत कैके व्यवसायिक रुपमे आघे बह्रना उत्प्रेरणा जागृत हुइनाके साथे बंगुर पालनके क्रममे डेखजैना रोग तथा समस्याके विषयमे फेन जानकारी लेना आग्रह करल रही । उहाँ राजापुरमे थारु समुदायसे परम्पराकालसे बंगुरपालन कैटी आइल साथे उहीहे व्यवसायिक रुपमे महिला डिडी बहिनीया आघे बह्रैटी गैलमे लैङ्गिक हिंसा समेत कम हुइना बटैली ।
उहाँ युनिकसे २ दिने निशुल्क रुपमे व्यवसायिक बंगुरपालन तालिम डेहल सक्कु जाने सक्रिय सहभागिता होके ज्ञान लेना समेत आग्रह कैनाके साथे तालिममे सहभागीहुक्रे बंगुर पालनके लाग महत्त्वपूर्ण विषय सिख्ना ओ इहीसे व्यवसायीक रुपमे बंगुर पालनमे सहयोग पुग्ना विश्वास समेत व्यक्त करल रही ।
उपप्रमुख चौधरी मेलमिलाप केन्द्रमे ढेर जैसिन महिला डिडी बहिनीयाहुक्रे आर्थिक रुपमे पीडित रहल कारणसे अइना करल ओरसे ओकर प्रभाव परिवार तथा समाजमे समेत पर्ना हुइल ओरसे महिलाहे उधमी बने पर्नामे जोड डेहल रही ।
उहाँ वेरोजगारके समस्या दिनानुदिन बह्रटी गैल ओरसे परिस्थितिहे मध्यनजर कैटी मेहनति, परिश्रमी, आत्मविश्वासी महिला डिडीबहिनीयाहे बंगुर पालन व्यवसायहे निरन्तरता डेना ओ अपने गाउँघरमे व्यवसाय कैके आर्थिक स्तरोन्नती करे सेकजैना बटाइल रही ।
ओस्टके कार्यक्रमके उद्देश्यबारे जानकारी डेटी युनिक नेपाल लघुबित्त बित्तीय संस्थाके शाखा प्रबन्धक निर्मल रैका युनिक नेपाल लघुवित्त वित्तीय संस्थासे बंगुरपालन कैटी आइल सदस्य तथा कुछ करम कहुइया सदस्यहे आत्मविश्वास बह्राके उद्यमी बनैना सहज हुइना उद्देश्यके साथ तालिम प्रदान करल बटैलै ।
शाखा प्रबन्धक रैका संस्थासे हरेक बरस ओइसीन आधारभूत सिपमुलक, आयमूलक तालिम प्रदान कैटी आइल समेत बटैलै ।
उहाँ युनिक नेपाल लघुवित्त वित्तिय संस्थासे हरेक बरस ग्राहक सदस्य सीपविकास कार्यक्रम अन्तर्गत सदस्यहे तालिम प्रदान कैना ओ ओकर निरन्तरता स्वरुप तालिम प्रदान करल बटैलै । दुईदिने व्यवसायिक बंगुरपालन तालिमके सहजीकरण पशु सेवा शाखा राजापुरमे कार्यरत पशु चिकित्सक पुर्ण बहादुर खत्री ओ कमल प्रसाद चौधरी करल रहिट ।
बंगुरपालन तालिमके सञ्चालन युनिक नेपाल लघुबित्त बित्तीय संस्था राजापुर शाखाके शाखा प्रबन्धक निर्मल रैका करल रहिट ।
