धनगढी उपमहानगरसे खुटिया सिँचाइ योजना पुनःस्थापनाके लाग मन्त्रालयहे पत्राचार
पहुरा समाचारदाता
धनगढी, ३ बैशाख । धनगढी उप–महानगरपालिकासे नम्मा समयसे निष्क्रिय अवस्थामे रहल ऐतिहासिक खुटिया सिँचाइ योजना पुनः सञ्चालनमे ल्यन्ना ऊर्जा, जलस्रोत तथा सिँचाइ मन्त्रालय समक्ष औपचारिक रूपमे माग तथा सिफारिस करले बा ।
उप–महानगरपालिकासे मन्त्रालयहे पठाइल पत्रमे कैलाली जिल्लाके धनगढी उप–महानगरपालिका ओ गोदावरी नगरपालिका लगायतके क्षेत्र समेटल खुटिया सिँचाइ योजना नम्मा समयसे निष्क्रिय अवस्थामे रहल उल्लेख करल बा ।
योजनाअन्तर्गत निर्माण करल नहर, हेडवक्र्स तथा अन्य संरचना हाल प्रयोगविहीन बन्टी गैल ओ कतिपय स्थानमे जीर्ण समेत हुइल जनाइल बा ।
पत्रमे विगतमे भारी लगानीमे निर्माण करल सिँचाइ प्रणाली प्रभावकारी रूपमे सञ्चालनमे नैरहल ओरसे कृषिमे प्रत्यक्ष असर परल उल्लेख करल बा । भूमिगत जलस्रोतमे कमी अइटी गैल, खेतबारीमे पानीके अभाव डेखल ओ किसान सिँचाइ समस्यासे प्रभावित हुइल अवस्थाहे मध्यनजर करटी योजना पुनःस्थापनाके आवश्यकता औंल्याइल बा ।
धनगढी उप–महानगरपालिकाके नगर प्रमुख गोपाल हमालसे हस्ताक्षरित पत्रमे खुटिया सिँचाइ योजनाके संरचनाके मर्मत, सुधार तथा पुनः सञ्चालनके लाग आवश्यक पहल कैना मन्त्रालयसँग आग्रह करल बा ।
उप–महानगरपालिकासे योजना पुनः सञ्चालनमे अइलेसे कृषि उत्पादन वृद्धि, पानी व्यवस्थापनमे सुधार ओ समग्र क्षेत्रीय विकासमे सकारात्मक प्रभाव पर्ना विश्वास व्यक्त करल बा ।
