गुरुवा संरक्षणमे जुटल स्थानीय तह
दुर्जनकुमार चौधरी
धनगढी, ६ वैशाख । थारु गुरुवाहुकनके प्रथा दिन प्रतिदिन कमजोर हुइटी गिल बा । पुख्र्यौली गुरुवाहुकनके देहावसान संगे गुरुवा प्रथा कमजोर हुइल हो ।
पुराना गुरुवा विस्थापित हुइना ओ नयाँ पुस्ताके युवाहुक्रे गुरुवाप्रथाप्रति चास नैरहल ओरसे गुरुवा प्रथा विस्थापित हुइल बा । गुरुवा प्रथा विस्थापित नैहोए कहिके कैलालीके स्थानीय तह गुरुवा संरक्षणमे जुटल बाटैं ।
गुरुवा संरक्षणके लाग प्रत्येक वडा वडामे मरुवा बना सेकल जानकी गाउँपालिकाके अध्यक्ष प्रदीप चौधरी जानकारी डेलैं । थारुहुकनके परम्परागत चालचलन संस्कार अनुसार कार्यविधि पूरा करेपरना हुइल ओरसे गुरुवा प्रथा संरक्षण करना एकदम जरुरी रहल चौधरी बटैलैं । गुरुवा प्रथा नैरलेसे हरेरी पुजा, डेसौहरी पुजा करे नैसेक्ना उहाँ बटैलैं । उहाँ बरका नाचके लाग पाँच लाख बजेट छुट्यइलेसे फेन कार्यक्रम करे नैसेकल बटैलैं ।
बर्दगोरिया गाउँपालिकाके अध्यक्ष बलिराम चौधरी गुरुवा प्रथा संगे गुरुवाके ज्ञानगुण समेत लोप हुइल ओरसे गुरुवा प्रथा संरक्षण करेपरना आवश्यक रहल बटैलैं । उहाँ गुरुवा संरक्षणके लाग मरुवा बनाइक लाग बजेट छुट्या सेकल समेत जानकारी डेलैं ।
ओस्टेक, कैलारी गाउँपालिकामे गुरुवाहुकनके संरक्षणके लाग मरुवा ओ गुरुवा बैठक घर निर्माण हुसेकल गाउँपालिकाके अध्यक्ष लाजुराम चौधरीले बटैलैं । उहाँ गुरुवा बैठक घर मर्मतके लाग एक लाख बजेट समेत छुट्यइल जानकारी डेलैं । साथे वडा नम्बर ७ मे १२ लाखके भल्मन्सा बैठक घर निर्माण करसेकल समेत उहाँ बटैलैं ।
गुरुवा प्रथा संरक्षणके लाग प्रत्येक स्थानीय तह ओ वडा वडामे गुरुवा बैठक घर बनैना आवश्यक रहल थारु गुरुवा बैदवा सेवा समिति समाजके अध्यक्ष रामप्रसाद डंगौरा थारु बटैलैं । उहाँ गुरुवा बैठक घरसंगे मरुवा स्थापना करेपरना आवश्यक रहल फेन बटैलैं ।
उहाँ बरका नाचके लाग व्यक्ति पिच्छे दश हजार खर्च लग्ना हुइल ओरसे स्थानीय तहहे बरका नाचके लाग बजेट छुट्याइक लाग आग्रह करलैं ।
बरका नाचके लाग लग्ना झाल, मंजिरा, ढालके साजसज्जा करेपरना हुइल ओरसे ओकर लाग सब संग पुँजी नैरहल ओरसे बरका नाचसंगे गुरुवा प्रथा विस्थापित हुइल उहाँक गुनासो पोख्लैं ।
अस्टेक, बर्दियाका बारबर्दिया नगरपालिकामे थारु मरुवा स्थापनाके लाग चार करोड बजेट छुट्यासेकल नगरप्रमुख दुर्गाप्रसाद चौधरी जानकारी डेलैं ।
थारुहुकनके मरुवा लोपोन्मुख अवस्थामे रहल ओरसे थारु समुदायके संस्कृति बचैना उद्देश्यसे थारु मरुवाके लाग बजेट छुट्याइल नगरपालिकाके नगर प्रमुख चौधरी बटैलैं ।
