धनगढीमे विद्यालय बन्द कैना निर्णय
पहुरा समाचारदाता
धनगढी, ६ बैशाख । धनगढी उपमहानगरपालिकासे २०७८ साल बैशाख ५ गते जिल्ला संकट व्यवस्थापन केन्द्र कैलालीके बैठकसे करल अनुरोध अनुसार बैशाख १५ गतेसम विद्यालय बन्द कैना निर्णय करले बा ।
कोरोनाके जोखिम बढल ओरसे जिल्ला संकट व्यवस्थापन केन्द्र कैलालीके बैठकसे स्थानीयतहहे अनुरोध करल रहे । सोम्मार सामुदायिक, निजी तथा संस्थागत विद्यालयके प्रधानाध्यापक, शिक्षक संघ संगठनके प्रतिनिधी, प्याव्सन, एनव्याव्सनके प्रतिनिधी ओ और सरोकारवालासंग सुझाव संकलन करलपाछे वैशाख १५ गतेसमहे विद्यालय बन्द कैना निर्णय करल हो । विद्यालयके सम्वन्धमे नेपाल सरकारसे ठप निर्णय हुके आइलेसे उहे अनुसार हुइना समेत निर्णय करल बा ।
प्रत्यक्ष पठनपाठन विद्यालयमे बन्द हुइलेसेफे सम्भव हुइटसम अनलाईन कक्षा संचालन कैना बारेमे विद्यालयहे जानकारी करैना तथा वार्षिक परीक्षा संचालनके लाग आवश्यक गृहकार्य कैना विद्यालयहे जानकारी करैना निर्णयफे धनगढी उपमहानगरपालिकासे करले बा ।
धनगढी उपमहानगरपालिकाके उपप्रमुख सुशीला मिश्र भट्ट सक्कु पक्षसंग सुझाव लेहलपाछे १९ वडाके वडा अध्यक्ष ओ शिक्षा शाखा प्रमुखके छलफलपाछे निर्णयमे पुगल बटैली ।
