काठमाडौं जिटल नेपाल सुपर लिगके उपाधि

काठमाडौं, १ जेठ । नेपालके पहिल फ्रेन्चाइज फुटबल प्रतियोगिता नेपाल सुपर लिग (एनएसएल)के उपाधि काठमाडौं रेजर्स एफसी जिटले बा । आज दशरथ रंगशालामे हुइल फाइनलमे धनगढी एफसीहे १–० गोलसे हटैटी काठमाडौं पहिल संस्करणके एनएसएलके उपाधि जिटल हो ।

काठमाडौंके लाग क्यामरुनी खेलाडी मेसोउके ओलोमोउ एक गोल करलैं । यी जिटपाछे काठमाडौं धनगढीसँग यीआघे बेहोरल दुई हारके बदला समेत लेले बा ।

यीआघे लिग चरणमे धनगढी काठमाडौंहे ३–० से पराजित करले रहे कलेसे पहिल क्वालिफायरमे धनगढी एक गोलसे पाछे परल स्थिति उल्टाके काठमाडौंहे २–१ से हटैले रहे ।

दशरथ रंगशालामे खेलके २१ औं मिनेटमे मेसोउके ओलोमोउ गोल करके काठमाडौंहे अग्रता दिलैले रहैं । धनगढीके विशाल राईसे विश्वास श्रेष्ठसे बल छिनेबेर डेहल पासमे मेसोउके धनगढीके दुई डिफेण्डरहे बिट करटी उत्कृष्ट फिनिङ मार्फत गोल करलैं । धनगढीके कप्तान तथा गोलकिपर किरण चेम्जोङ रोक्ना कौनो अवसर नैपैलैं ।

पहिल हाफमे पाइल एक अवसरमे काठमाडौं गोल करटी अग्रता लेले रहे । दोसर हाफ प्रतिस्पर्धात्मक बनल रहे । दुनु टोलीसे गोल करना अवसर पैलेसे फेन सदुपयोग करे नैसेक्लैं ।
दोसर हाफके सुरुमे धनगढी बराबरी करना अवसर गुमाइल । ४७ औं मिनेटमे सिक्स यार्ड बक्समे प्राप्त बलमे धनगढीके बुद्ध बल तामाङके प्रहार गोलकिपर विकेश कुथु बिट हुसेकल अवस्थामे डिफेण्डर फ्लोरेन्ट क्वारासे गोललाइनसे कुछ आघेसे बचैलैं ।

उपाछे पुजन उपरकोटी ओ मार्की प्लेअर विशाल राई फेन गोलके अवसर गुमैलैं ।

५५ औं मिनेटमे धनगढीके अशोक खवासके प्रहार काठमाडौंके गोलकिपर विकेशसे क्रस बार उप्परसे बाहेर पठैले रहैं । ६५ औं मिनेटमे काठमाडौंके स्टेफेन विनोङ पेनाल्टी एरियाभित्तरसे प्रहार करल बल धनगढीके गोलकिपर किरण चेम्जोङके हातमे लाग्के बाहेर गैल ।

८८ औं मिनेटमे पुजन उपरकोटीके प्रहार क्रस बारके कुछ उप्परसे बाहेरहुके धनगढी औरे अवसर गुमाइल । ८९ औं मिनेटमे काठमाडौंके स्टेफेन विनोङ समिर पेनाल्टी एरिया बाहेरसे करल प्रहार धनगढीके गोलकिपर किरण चेम्जोङके हातमे लाग्के बाहेरहुइल । इन्जुरी समयमे धनगढीसे बराबरीके लाग सब शक्ति लगैलेसे फेन गोल फिर्ताकरे नैसेकल ।

च्याम्पियन काठमाडौं उपाधिसँगे नगद ३५ लाख पक्का करल कलेसे धनगढी १५ लाख रुपैयाँमे चित्त बुझाइल ।