वनमन्त्री बन्टी नारदमुनी राना
काठमाडौं, २७ जेठ । प्रधानमन्त्री केपी शर्मा ओली आज ७ मन्त्री ओ १ राज्यमन्त्री नियुक्त करटैं । उहाँ कैलालीसे निर्वाचित नारदमुनी रानाहे मन्त्रीमे नियुक्त करटैं । ओली वन तथा वातावरणमन्त्रीमे रानाहे नियुक्त करे लागल हुइँट् ।
अस्टेक, गृहमन्त्रीमे खगराज अधिकारी ओ सञ्चार तथा सूचना प्रविधिमन्त्रीमे नैनकला थापासहित ८ मन्त्री नियुक्त करटैं । थापा पूर्वगृहमन्त्री रामबहादुर थापा बादलके गोसिनिया हुइँट् । अस्टेक, कृषिमन्त्रीमे ज्वालाकुमारी शाह, उद्योगमन्त्रीमे राजकिशोर यादव, सामान्य प्रशासनमन्त्रीमे गणेश पहाडीके नाम तय हुइल बा ।
रक्षा मन्त्रालय भर प्रधानमन्त्री अप्नही ढरले बटैं । अस्टेक, प्रधानमन्त्री कार्यालय रहना मेरिक मोहन बाँनिया ओ वन राज्यमन्त्रीमे आशा विक रहल बटी । उ ८ मन्त्रीहुकनके आज साँझ शपथ ढरल बा ।
के हुइँट् राना ?
यी चोट प्रधानमन्त्री ओली अधिकांश नयाँ अनुहारहे मन्त्री बनैले बटैं । उ मध्येके १ हुइँट नारदमुनी राना । उहाँहे वन तथा वातावरण मन्त्री बनैना तयारी करल बा । राना समुदायसे उहाँ ३५ वर्ष बाद मन्त्री बने लागल बटैं ।
२०३८ सालमे राष्ट्रिय पञ्चायत सदस्यमे मनोनीत लबरु राना थारु २०४२ सालमे भूमि सुधार राज्यमन्त्री हुइल रहि । कैलाली, कञ्चनपुरमे राना थारुहुहनके बसोबास बा ।
यी चोट वन मन्त्री बन्टी रहल राना विघटित प्रतिनिधि सभा सदस्यमे कैलाली क्षेत्र नम्बर ५ से निर्वाचित हुइल रहैं । उहाँ काँग्रेस सभापति शेरबहादुर देउवाके पत्नी आरजू राणा देउवाहे पराजित करले रहैं ।
२०६४ सालके संविधान सभा सदस्यमे समेत निर्वाचित राना २०५४ सालमे धनगढी उपमहानगरपालिकाके उपप्रमुख पदमे निर्वाचित हुइल रहैं ।
२०६१ सालमे सेती अञ्चल अस्पताल विकास समितिके ९ महिना अध्यक्ष रहल राना शिवनगर खानेपानी तथा सरसफाइ उपभोक्ता समितिके ९ वर्षसम अध्यक्ष रहैं ।
२०२९ वैशाख १९ गते धनगढी उपमहानगरपालिका–९, धनगढीगाउँमे स्वर्गीय रत्तीराम राना थारु ओ सुदामादेवी राना थारुके कोखसे राना जन्मल उहाँ राजनैतिकशात्रमे स्नातकोत्तर करले बटैं ।
उहाँ काँग्रेस सभापति शेरबहादुर देउवाके पत्नी आरजू राणा देउवाहे पराजित करल रहैं । उ बेला रानाके मत २७ हजार २३२ रहे कलेसे राणा २२ हजार ३ सय २२ मत प्राप्त करले रहि ।
२०४३ सालमे अनेरास्ववियु पाँचौँके सदस्य रहल राना २०४६ के आन्दोलनमे थुनामे परल रहैं । २०४८ मे नेकपा एमाले तत्कालीन धनगढी नगरपालिका ८ के पार्टी सक्रिय दलमे रहल उहाँ औरे वर्ष २०४९ सालमे सचिव बन्लैं । ओकर बाद २०५१ सालसम राना अध्यक्ष रहैं ।
२०५३ सालसम उहाँ नगर कमिटी सदस्य रहैं । निर्वाचन क्षेत्रीय समन्वय कमिटीके सदस्य ४ वर्ष रहैं । २०५६ से २०७२ सालसम १६ वर्ष उहाँ जिल्ला कमिटी ओ सचिवालय सदस्य रहैं । ३०७३ सालमे वैकल्पिक केन्द्रीय सदस्य रहल राना २०७५ सालमे केन्द्रीय सदस्य हुइल रहैं ।
अब्बे राना नेकपा एमालेके सुदूरपश्चिम प्रदेश सहइन्चार्ज तथा कैलालीके इन्चार्ज हुइँट् ।
