वनसंगे संस्कृति संरक्षणमे योगदान

पहुरा समाचारदाता
धनगढी, २४ कुवाँर । कैलालीके धनगढी उपमहानगरपालिका वडा नम्बर ७ मे रहल देवहरिया सामुदायिक वन उपभोक्ता समुहके २३औं वार्षिक साधारण सभा शनिच्चरके रोज सम्पन्न हुइल बा ।
उ सामुदायिक वनके अध्यक्ष भागीराम चौधरीके अध्यक्षतामे हुइल कार्यक्रममे डिभिजन वन कार्यालय धनगढीके निमित्त प्रमुख जिविच्छ यादव प्रमुख अतिथि रहल रहिट । कार्यक्रममे सम्बोधनके क्रममे यी सामुदायिक वनसे वन संरक्षणसंगे यहाँ सामुदायके कला, संस्कृति संरक्षणमे योगदान पुगैटी रहल चर्चा करलै । उहाँ कहलै, यहाँके ढेर सामुदायिक वन वार्षिक साधारण सभा करेबेर औपचारिकता केल्ह निभैलेसेफे देवहरिया समुदायिक वन विधि प्रक्रिया अनुसार पारदार्शिता हिसावसे वार्षिक साधरण सभा करटी आइल बा ।
उहाँ कहलै, वन जोगैना सक्कु जानेक दायित्व हो । वन भिटर मठमन्दिर निर्माण कैनासेफे वन संरक्षणमे जोर डेहे परठ । भौतिक संरक्षण बनाई पर्ना हो कलेसे सरकारके अनुमति लेहे बनाई पर्ना हो ।
सामुदायिक वन व्यवस्थापनमे सुदूरपश्चिम प्रदेश पाछे रहल ओम्नेसे कैलाली झन पाछे रहल कहटी नीतिगत व्यवस्थापन जरुरी रहल निमित्त प्रमुख यादव बटैलै ।
कैलालीके गौरीगंगा नगरपालिकाके वनमे गैल १६ गते बाघसे एक जानेक ज्यान गैल कहटी वन कार्यालय ओ शुक्लाफाँटाके टोली निरन्तरण खोजी कार्य करटी रहल बटैलै । उहाँ कहलै, उ बाघ एक जानेक लेले बा । कलेसे कबु सेहरीके वनुवा, कबु पटेलाके बनुवामे डेखल कहटी खोजी कार्य जारी रहल कहटी अकेली डुकेली वनमे नैजैना आग्रह करलै ।
कार्यक्रममे डिभिजन वन कार्यालयके रेन्जर सत्य कुमाल कैलालीमे रहल और सामुदायिक वनसे यी वन नमुना रहल बटैली । वन संरक्षण कैना सक्कु जानेक अपनत्व आवश्यक रहल बटैली ।
राष्ट्रिय वन उपभोक्ता महासंघ नेपालके महासचिव डण्डीराज सुवेदी ९ सय सामुदायिक वन रहल कहटी यी सामुदायिक वनके प्रगती एकदम सन्तोषजनक रहल बटैलै । देवहरिया सामुदायिक वनसे वनसंगे संस्कृति संरक्षणमे भारी भूमिका खेल्टी आइल बटैलै ।
कार्यक्रममे धनगढी उपमहानगरपालिका वडा नम्बर ७ के वडा अध्यक्ष मोती रानाथारु, उ सामुदायिक वनके पूर्व अध्यक्ष उद्धव विष्ट, शिव माविके प्रअ नन्दलाल राना, सरस्वती मावि मनेहराके पूर्व प्रअ ज्ञानेन्द्र शाह, नव ज्योति कृषि सहकारीके उपाध्यक्ष भीरा राना, सृजना महिला सामुदायिक वनके अध्यक्ष यमुना भट्ट, देवहरिया गाउँक भल्मन्सा जगन्नाथ रानालगायत मन्तव्य व्यक्त करल रहिट । कार्यक्रमके संचालन सचिव सरस्वती रेग्मी ओ स्वागत मन्तव्य समितिके सल्लाहकार कृष्णराज ओझा करल रहिट । कार्यक्रममे समितिके अध्यक्ष भागीराम चौधरी वन संरक्षण कैना सक्कु उपभोक्ताके बराबर दायित्व रहल बटैलै । कार्यक्रममे टमान समुदायके संस्कृति झल्कना नृत्य प्रस्तुत कैगिल रहे ।

• देवरिया सामुदायिक वन उपभोक्ता समूहसे आर्थिक वर्ष २०८२/०८३ मे करल प्रगती विवरण

देवरिया सामुदायिक वन उपभोक्ता समूहसे आर्थिक वर्ष २०८२/०८३ मे प्लट नं ४ ओ ५ मे झाडी सरसफाई कार्य सम्पन्न करले बा । आगलागी नियन्त्रणके लाग सातु प्लटमे अग्नी रेखा निर्माण करले बा ।
समुहके १ नं प्लटमे १०० वोट उन्नत जातके बाँसके विरुवा रोपण ओ आँम, मसला बकैनो आदी जातके टेलुवा समेत लगाइल बा । आँम लिचि, अम्बा कागती चाइनिज फूल घुपीके टेलुवा करके ७०० थान बोटबिरुवा निःशुल्क रुपमे समूहके उपभोक्ता सदस्यहुकनहे ओ टमान संघ संस्थाहे वितरण करल बा ।
यी समूहके समूह सदस्यहुकनके परिवारमे स्वर्गारोहण हुइल २६ जानेहे १३० क्वीन्टल काठी दाहसंसकारके लाग निःशुल्क वितरण करल बा ।
कार्य समिती ओ उपभोका सदस्य सम्मिलित सामुदायिक वन अवलोकनके क्रममे सठी सा.व.उ.स. अवलोकन करल अवलोकन पश्चात वेत जातके टेलुवाके नर्सरी वनाइल ओ समूहके टमान प्लटमे लगैना योजना रहल बा ।
कैलाशपती माहादेव मन्दिरमे रु २५ सय सहयोग ओ २ थान खाम १ थान वल्ली उपलब्ध करल बा । सामुदायिक वन उपभोक्तामे रु.७ हजार नगद आर्थिक सहयोग जाखौर बाबा यूवा क्लवहे रु.१० हजार आर्थिक सहयोग, देवहरीया गाँउ रानाथारु समुदायहे सावनके होलाके लाग रु.३१ हजार २५० बराबरके १२५ ओ फि खामा ओ वल्ली उपलब्ध कराइल बा ।
यी समूहमे कार्यरत कर्मचारीके लाग कर्मचारी हितकोष स्थापना, यी समूहके उपभोक्ता सदस्य क्यान्सर पीडितहे रु. ५ हजार आर्थिक सहयोग करल बा ।
यी समूहसे आ.व.००८२÷०८३ मे समुहके प्रयोजनके लाग सभाहल निर्माण कार्य ५० प्रतिशत काम सम्पन्न करल जनैले बा ।