धनगढीके १२ सहित कैलालीके ६६ जहनमे संक्रमण पुष्टि
धनगढी, २८ जेठ । सेती प्रादेशिक अस्पतालके प्रयोगशालामे करल परीक्षणमे १ सय हनमे कोरोना भाइरसके संक्रमण पुष्टि हुइल बा । २४ घण्टामे सेती प्रादेशिक अस्पतालके प्रयोगशालामे ३ सय ७३ नमूना परीक्षण करलमे १ सय जहनमे संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ जानकारी डेलैं ।
उहाँक अनुसार धनगढीके १२ जाने अस्टेक धनगढीबाहेक कैलालीके ५४ जाने ओ अन्य जिल्लाके ३४ जहनमे संक्रमण पुष्टि हुइल बटैलैं ।
हाल अस्पतालमे १९ जाने कोरोना संक्रमितके उपचार हुइटा । जोनमध्ये ४ जाने आइसियूमे, १० जाने अक्सिजन सपोर्टमे उपचाररत बटैं कलेसे ४ जहनके अवस्था सामान्य रहल अस्पताल जनैले बा ।
बिटल २४ घण्टामे सेती अस्पतालमे ९ जाने कोरोनामुक्त हुके घर लौटल बटैं कलेसे ३ जाने अस्पताल भर्ना हुइल सूचना अधिकारी श्रेष्ठ जानकारी डेलैं । गैल २४ घण्टामे अस्पतामे उपचाररत १ जाने कोरोना संक्रमितके मृत्यु हुइल अस्पताल जनैले बा ।
