‘हमार सुदूरपश्चिम, हम्रे चिन्हैबी’ अभियानके वृत्तचित्र भाग–१ सार्वजनिक
पहुरा समाचारदाता
धनगढी, २७ कुवाँर । सुदूरपश्चिम प्रदेशके धार्मिक, ऐतिहासिक तथा पर्यटकीय स्थलके पहिचान ओ प्रवद्र्धन कैना उद्देश्यसे धनगढी उपमहानगरपालिकासे सञ्चालित ‘हमार सुदूरपश्चिम, हम्रे चिन्हैबी’ अभियानअन्तर्गत तयार पारल वृत्तचित्र भाग १ सार्वजनिक करल बा ।
धनगढीमे आयोजित कार्यक्रममे सुदूरपश्चिमके धार्मिक तथा पर्यटकीय गन्तव्यके विशेषता, ऐतिहासिक महत्व ओ प्राकृतिक सौन्दर्य समेटके तयार पारल वृत्तचित्र सार्वजनिक करल हो । कार्यक्रममे उपस्थित विशिष्ट अतिथिहुक्रे वृत्तचित्रसंगे अभियानअन्तर्गत तयार पारल बुकलेटसमेत विमोचन करल रहिट ।
वृत्तचित्रमे सुदूरपश्चिम प्रदेशमे रहल प्रमुख धार्मिक स्थल, ऐतिहासिक सम्पदा, प्राकृतिक आकर्षण तथा पर्यटकीय गन्तव्यहे समेटल बा । यी मार्फत प्रदेशके टमान स्थानके धार्मिक, सांस्कृतिक तथा ऐतिहासिक महत््वहे दृश्य सामग्रीके माध्यमसे आम नागरिकमाझ पुगैना प्रयास करल बा ।
सुदूरपश्चिम प्राकृतिक सौन्दर्य, धार्मिक आस्था, मौलिक संस्कृति ओ ऐतिहासिक सम्पदासे समृद्ध हुइलेसेफे ढेर गन्तव्य पर्याप्त प्रचारप्रसारके अभावमे ओझेलमे बटै । यैसिन स्थलके पहिचानहे व्यापक बनैटी आन्तरिक तथा बाह्य पर्यटक आकर्षित कैना उद्देश्यसे अभियान सञ्चालन करल हो ।
अभियानअन्तर्गत तयार पारल वृत्तचित्र ओ बुकलेटसे सुदूरपश्चिमके पर्यटकीय गन्तव्यबारे जानकारी प्रवाह कैना, पर्यटन सम्भावना उजागर कैना ओ प्रदेशके मौलिक पहिचानहे राष्ट्रिय तथा अन्तर्राष्ट्रिय स्तरमे चिन्हैना सहयोग पुग्न अपेक्षा करल बा ।
धनगढी उपमहानगरपालिकाके यी पहलसे पर्यटन प्रवद्र्धनसंगे स्थानीय संस्कृति, धार्मिक परम्परा ओ ऐतिहासिक सम्पदाके संरक्षण तथा प्रचारप्रसारमे समेत योगदान पुगैना विश्वास करल बा ।
