बर्दियामे बनल बरघर रोड
पहुरा समाचारदाता
बर्दिया, ३१ जेठ । थारु समुदायके इतिहास तथा पहिचानसंग जोरल बरघर प्रणालीके नामसे राजापुर नगरपालिकाके वडा नं. २ मे जोतपुर गाउँसे ग्वारीसम १४०० मिटर नम्मा ओ ८ मिटर चौडाई रोड निर्माण करल बा ।
बरघर रोड नामाकरण करल उ रोड गाउँक्षेत्रहे बजारसंग जारना, बजार ठप विस्तार कैना, कृषि उत्पादनके ओसार पसार सहज बनैना ओ विद्यार्थीहुकनहे विद्यालय अइना जैना सहज बनाई ।
थारु गाउँमे बरघरसे गाउँके सक्कु राजनीतिक, सामाजिक, आर्थिक ओ साँस्कृतिक कार्यके नेतृत्व करल रहठ । बरघर गाउँके नेता हुइट । हरेक थारु गाउँमे बरघर हुइना करठै । गाउँमे बेठ बेगारी, कुलापानी सिंचाई, मरणी करणीसे लेके पूजापाठ ओ सामाजिक कार्य यिहे बरघर मार्फत हुइना करठ । दुसर अर्थमे, बरघर कहलेक थारु समुदायके प्रमुख पहिचान हो । जहाँ थारु उहाँ बरघर । टबमारे, थारु समुदायके पहिचान स्थापित करेक लाग उ रोडके नामाकरण बरघर धारल बटैठै जोतपुर निवासी युवा नेता तथा बर्दियाली थारु विकास मञ्च, काठमाडौंके केन्द्रिय अध्यक्ष सिताराम थारु । हम्रे अपन पहिचान स्थापित कैना सक्कु थरुहटमे यिहे बाट सिखे परल ।
ओस्टेक करके जोतपुरके एक युवा समाजसेवी तथा जंग्रार साहित्यिक बखेरीके अध्यक्ष सोम डेमनडौरा कहठै, हम्रे अपन सामाजिक तथा सांस्कृतिक प्रणाली, धरोहर तथा महत्वपूर्ण योगदान पुगाइल व्यक्तिहुकनके नाउँसे रोड, चौक तथा सार्वजनिक स्थलके नामाकरण करे परठ । अैसिक करलेसे उ स्थानके आदिबासीहुकनके पहिचान स्थापित हुइटी जैना ओ इतिहासफे रही । उहाँ सामाजिक सञ्जाल फेसबुकमे लिख्ठै, खास करके थरुहट क्षेत्रके नामाकरण करेबेर ध्यान डेहे पर्ना बाट, गाउँ, ठाउँ, कुलुवा, गल्ली, रोड, चौक या सार्वजनिक ठाउँके नामाकरण करेबेर कुहीहे गारी कैना, होच्यइना, उच्छृङ्खल, अश्लिलखालके नाम धारे नइपरठ ।
लास्या बजार, चुतिया चौक जैसिन नाउँहे तुरुन्त सच्याके मौलिक मने सभ्य नाउँ धारी । थरुहट पहिचान, इतिहास या साँस्कृतिक तथा सामाजिक नाम झल्कइना नाउ धारी । जस्टे कि, बरघर चौक, बरघर रोड, गुर्वा चौक या समाज, गाउँ बनैना महत्वपूर्ण योगदान पुगाइल व्यक्तिके नाउसे (गुम्रा चौक, राधाकृष्ण रोड, आदि……) धारी । बिगारल नाउँहे सुधारी । जस्टे की कि सडुवा– सरुवा÷सर्वा, नयाँगाउँ– लवलपुर÷लौलपुर, बड्का भौंरा– बर्का भौंरा, तल्ना बरगदही– टर्ना बरगदही, गुवारी– ग्वारी आदि आदि ।
हमार यहाँ खेती योग्य जमिन हुइलेसेफे उ जमिनके उत्पादन व्यवस्थापन कैना डगर घाट नइहो । विद्यार्थीहुकनहे घुमाउरो डगरसे विद्यालय जाई परठ । यी रोडसे हरेक बाटके बजारीकरणमे सहयोग पुगी कहठै वडा अध्यक्ष धरनीधर थारु । यी बेला युवा वेरोजगार बैठल बटै । युवा स्वरोजगार अन्तर्गत रहल मानव संशाधनहे हम्रे यिहे कार्यमे लगाई । यी रोडसे खास करके राजापुर नगरपालिकामे रहल बाला बजारहे जोरी ।
