निषेधाज्ञा खुकुलो हुइलओरसे कोरोना संक्रमण फेर बह्रलः स्वास्थ्य मन्त्रालय
काठमाडौं, ७ सावन । स्वास्थ्य तथा जनसंख्या मन्त्रालयसे निषेधाज्ञा खुकुलो हुइलपाछे एक हप्तायहोर कोरोना संक्रमण दर फेर बढल बटैले बा ।
मन्त्रालयसे विज्ञप्ति जारी करके आब अब चुनौतीपूर्ण टिसरा लहर शुरु हुई सेक्ना कहटी स्वास्थ्य संस्थाहे तयारी अवस्थामे रहनफे कहल बा ।
निषेधाज्ञा खुकुलो हुइलपाछे लुकीछिपी वा खुल्लमखुल्ला जनस्वास्थ्यके मापदण्ड उल्लंघन हुइटी रहल कहटी मन्त्रालयसे यी अवधिमे कोरोना संक्रमण जटरा घटे पर्ना हो ओटरा घटे नइसेकल उल्लेख करले बा ।
अब्बेफे १० जिल्लामे ५०० से ढेर ओ २६ जिल्लामे २०० से ढेर सक्रिय संक्रमित रहल कहटी स्वास्थ्य मन्त्रालयसे संक्रमणके जोखिम अभिन बह्रटी रहल बटैले बा । मन्त्रालयके सहायक प्रवक्ता डा. समीरकुमार अधिकारीके अनुसार खोप केन्द्रहुकनमे हुइना भिडसेफे संक्रमणके जोखिम बढाइल बा । टबमारे मन्त्रालयसे खोप लगाई जाईबेर अपन पालामे लगैना ओ जनस्वास्थ्यके मापदण्ड अपनैना आग्रह करल बा ।
‘संक्रमणके बढ्टी अवस्था चुनौतीपूर्ण टिसरा लहर आई सेक्ना मध्यनजर करटी सक्कु स्वास्थ्य संस्थाहुकनके अक्सिजन, शय्यालगायतके पूर्वाधार तथा सेवा चुस्त दुरुस्त धारे नइपरठ अनुरोध समेत बा’ मन्त्रालय कहले बा ।
थप १८५५ मे कोरोना पुष्टि, १२८८ जाने संक्रमणमुक्त
बिटल २४ घण्टामे नेपालमे १ हजार ८ सय ५५ जहनमे कोरोना भाइरस संक्रमण डेखाइल बा । स्वास्थ्य तथा जनसंख्या मन्त्रालयके अनुसार ९ हजार १ सय २२ पीसीआर परीक्षणमे बिफके रोज थप १ हजार ८ सय ५५ जहनमे संक्रमण पुष्टि हुइल हो ।
अस्टेक एन्टिजेन विधिसे करल ३ हजार ७ सय ७ परीक्षणसे ८ सय ५९ जहनमे संक्रमण पोजिटिभ डेखाइल बा । २४ घण्टामे पीसीआर ओ एन्टिजेन विधिसे करल १२ हजार ८ सय २९ परीक्षणमे २ हजार ७ सय १४ जहनमे संक्रमण पुष्टि हुइल मन्त्रालय जनैले बा । यीसँगे नेपालमे कोरोना संक्रमण हुइनाके संख्या ६ लाख ७४ हजार ७ सय २६ पुगल बा ।
पछिल्का २४ घण्टामे थप १ हजार २ सय ८८ जाने संक्रमणमुक्त हुइल बटैं । हालसम नेपालमे कोरोनामुक्त हुइनाके संख्या ६ लाख ३७ हजार ६ सय ९० बा ।
नेपालमे कोरोना संक्रमणसे थप २४ जहनके मृत्यु हुइल बा । यीसँगे नेपालमे कोरोनासे मृत्यु हुइनाके संख्या ९ हजार ६ सय ६१ पुगल बा ।
